"ინტერნეტში საჯაროდ განთავსებული ნებისმიერი ინფორმაციის გადმოწერა, შენახვა, ან გავრცელება არ შეიძლება იყოს დასჯადი" - ანი აროშიძემ და გირჩმა საკონსტიტუციო სასამართლოს სარჩელით მიმართეს

პოლიტიკა - 10:14, 13 Mar, 2019

1167

ანი აროშიძემ, რომელიც 2019 წლის 31 იანვარს დააკავეს ერთ-ერთი დეპუტატის პირადი ცხოვრების ამსახველი ფარული ჩანაწერების გავრცელების გამო, „გირჩის" ლიდერებთან, ზურა ჯაფარიძესა და იაგო ხვიჩიასთან ერთად, საქართველოს საკონსტიტუციო სასამართლოს კონსტიტუციური სარჩელით მიმართა.

ანი აროშიძეს მიაჩნია, რომ სისხლის სამართლის კოდექსის 157-ე პრიმა მუხლის პირველი და მეორე ნაწილები, რაც გულისხმობს ადამიანების პირადი ცხოვრების ამსახველი მასალის უკანონო მოპოვება, შენახვა და გავრცელებას, წინააღმდეგობაში მოდის საქართველოს კონსტიტუციის მე-17 მუხლის (აზრის, ინფორმაციის, მასობრივი ინფორმაციის საშუალებათა და ინტერნეტის თავისუფლების უფლებები) პირველ, მე- 2 და მე- 5 პუნქტებთან და საქართველოს კონსტიტუციის 31 მუხლის (საპროცესო უფლებები) მე-9 პუნქტთან.

კერძოდ, მოსარჩელე მხარეს მიაჩნია, რომ ინტერნეტში უკვე გავრცელებული ინფორმაცია არის საჯარო, მისი მოპოვება, შენახვა და გაგზავნა პირადი მიმოწერის საშუალებით არ შეიძლება იყოს დანაშაული. ანი აროშიძის აზრით, ის რაც მან ჩაიდინა, არის გამოხატვის თავისუფლება და დაუშვებელია მსგავსი საქციელისთვის რაიმე სახის სანქციის დაკისრება.

“როგორც იცით, 16 ადამიანს ემუქრება პატიმრობა 4-დან 8 წლამდე იმის გამო, რომ მათ ინტერნეტში საჯაროდ განთავსებული ერთ-ერთი პოლიტიკოსის პირადი ცხოვრების ჩანაწერები უპოვეს... ზოგმა მოიპოვა, ზოგმა შეინახა. ეს არის სრული სიგიჟე. არ შეიძლება ადამიანს ამის გამო სჯიდეს სახელმწიფო. ზოგადად, ვფიქრობთ, რომ ინტერნეტში საჯაროდ განთავსებული ნებისმიერი ინფორმაცია, თუ ფაილი, მისი მოპოვება იქნება, თუ გადმოწერა იქნება, თუ გავრცელება იქნება ზოგადად არ შეიძლება იყოს დასჯადი,“- განაცხადა „გირჩის“ ლიდერმა ზურაბ გირჩი ჯაფარიძემ.