ნინო ჟვანიას ქუჩაზე მაღალსართულიანი კორპუსის მშენებლობის გამო კლდე ჩამოიშალა - აღნიშნულში ექსპერტ-გეოლოგებისა და არასამთავრობო ორგანიზაციების ნაწილი დედაქალაქის მერს კახა კალაძეს ადანაშაულებს.

მათი განცხადებით, აღნიშნულ მონაკვეთზე მშენებლობები შეჩერებული იყო, თუმცა, მერიის სპეციალური ნებართვის საფუძველზე სამუშაოები განახლდა.

„მიმდინარეობს უკანონოდ დაკანონებული მშენებლობები ადამიანების სიცოცხლის და ჯანმრთელობის ხარჯზე. პასუხისმგებლობა მიმდინარე პროცესებზე ცალსახად არის თბილისი მერიის მისამართით და კონკრეტულად, თბილისის მერის, რომელიც ყველა ასეთ ფაქტზე არის ძალიან მშვიდი, არ რეაგირებს,“ - აცხადებს ტრანსპორტისა და გზების ასოციაციის ხელმძღვანელი, დავით მესხიშვილი.

იმავე აზრზე არიან გეოლოგებიც:

„ფაქტობრივად, დააბეტონეს მდინარის ხეობა და რაღაც ერთმეტრიანი დიამეტრის საოცარ ხვრელში მოაქციეს მდინარე, რომელიც შეიძლება, ისე ადიდდეს სეზონურად, შეიძლება, ჩამორეცხოს მთლიანად და ჩამოიტანოს,“ - განმარტავს თეა გოდოლაძე.

დედაქალაქის მერის მოადგილის განცხადებით, ჟვანიას ქუჩაზე მიმდინარე მშენებლობები ადგილობრივი მოსახლეობისთვის არანაირ საფრთხეს არ წარმოადგენს.

„მშენებლობები, რომლებიც იქ მიმდინარეობდა, ჩვენ ხელმეორედ გადავამოწმეთ. გაჩერებულიც კი იყო რაღაც პერიოდი მშენებლობები იმიტომ, რომ გვსურდა, დავრწმუნებულიყავით, რომ არ იყო რაიმე გეოლოგიური პრობლემა. შემიძლია, დანამდვილებით ვთქვა, რომ ყველა მშენებლობას, რომელიც მიმდინარეობს ჟვანიას ქუჩაზე, მათ, გეოლოგიიდან გამომდინარე, არ ესახება რაიმე პრობლემები,“ - განაცხადა ილია ელოშვილმა.

მიწა ჟვანიას ქუჩაზე დღეს ჩამოიშალა, შემთხვევის შედეგად არავინ დაშავებულა.