გურჯაანის რაიონულმა სასამართლომ გაერთიანებული ოპოზიციის „ძალა ერთობაშიას“ ერთ-ერთი ლიდერი დავით კირკიტაძე კვლავ პატიმრობაში დატოვა. ადვოკატ გიორგი კონდახიშვილის განცხადებით, კირკიტაძე უკანონო პატიმარია და პროცესი ევროპულ სასამართლოში აუცილებლად გადაინაცვლებს:

„ის ტექნიკური პირობა, რის გამოც წინა სასამართლოს სხდომაზე ჩვენ უარი გვეთქვა შუამდგომლობის დაკმაყოფილებაზე, შესრულდა დაცვის მხარის მიერ, თუმცა, სასამართლომ დღეს მოიგონა, ახალი მიზეზი, თითქოს აქ არ იყო ახალი გარემოება და საერთოდ ხაზი გადაუსვა მის მიერ წინასასამართლო პროცესზე გაკეთებულ სამართლებრივ განმარტებას, ძალიანს ამწუხაროა, ყველაფერი ნათელია, აქ არის კლასიკური შერჩევითი სამართლის პრეცედენტი დავით კირკიტაძესთან მიმართებით და სრული პასუხისმგებლობით შემიძლია ვთქვა, რომ დავით კირკიტაძე უკანონოდ რჩება პატიმრობაში, ჩვენ გავაგრძელებთ ბრძოლას, როგორც ქვეყნის შიგნით, ასევე ადამიანის უფლებათა ევროპულ სასამართლოში და აუცილებლად მივაღწევთ შედეგს, სადაც დადასტურდება, რომ დავით კირკიტაძე არის უკანონო პატიმარი“, - განაცხადა ადვოკატმა.