გაერთიანებული ოპოზიციის ერთ-ერთი ლიდერი დავით კირკიტაძე სასამართლომ კვლავ პატიმრობაში დატოვა. აღნიშნულს ოპოზიციის ერთ-ერთი ლიდერი ნიკა მელია გამოეხმაურა და განაცხადა, რომ მოსამართლე ნუნუ ნემსიწვერიძემ არაფრად ჩააგდო 30-მდე დეპუტატის და 2000-მდე ადამიანის ნება და პასუხისმგებობა და დავით კირკიტაძე მაინც პატიმრობაში დატოვა.

„მოდით, ვთქვათ ვინ არის ეს ქალბატონი, რომელმაც წლების წინ მკვლელობაზე გაასამართლა ადამიანი, გაუშვა ციხეში და მერე 6 თვის შემდეგ მოკლული აღმოჩნდა ცოცხალი. ამის შემდეგ კი ის დათხოვნილი იქნა სასამართლო სისტემიდან. მერე „ქართულმა ოცნებამ“ დააბრუნა. მანვე გამოსცა განჩინება დათო კირკიტაძის დაპატიმრების შესახებ და 15 თებერვალს მურუსიძე-ჩინჩალაძემ ეს ქალბატონი დანიშნა და გაამწესა უვადოდ. ეს ქალბატონი მინიმუმ 20 წელი მოსამართლე იქნება. აი, რისთვის სჭირდება მურუსიძე-ჩინჩალაძეს მოსამართლეების უვადოდ განწესება. ვაგრძელებთ ბრძოლას, ვიდრე ჩინჩალაძეები, მურუსიძეები, ბედუკაძეები და გახარიები არ დამარცხდებიან. მე ერთ რამეში ვარ დარწმუნებული, კირკიტაძეს გაუცვლის ადგილს გიორგი გახარია“, - განაცხადა მელიამ.