შტურმი TBC ბანკზე და დახურული შეხვედრა შუშის სასახლეში - რა უთხრა ივანიშვილს აშშ-ის სახელმწიფო დეპარტამენტის წარმომადგენელმა

პოლიტიკა - 21:40, 11 Mar, 2019

8622

ამერიკის სახელმწიფო დეპარტამენტის წარმომადგენელი TBC ბანკზე სასაუბროდ ბიძინა ივანიშვილს შუშის სასახლეში შეხვდა. კურტ ვოლკერის მანქანა, რომელიც ივანიშვილის რეზიდენციაში შევიდა, დღეს „კურიერის“ კამერამ გადაიღო. შეხვედრის შემდეგ, ამერიკელმა დიპლომატმა "კურიერს" ექსკლუზიური ინტერვიუ მისცა და არ დამალა, რომ ანაკლიის ღრმაწყლოვანი პორტის მშენებლობა ამერიკის ინტერესებში შედის.

ვოლკერმა დღეს საქართველოს მთავრობა გააფრთხილა, რომ ბრძოლის ასეთი მეთოდებით ცეცხლს ეთამაშება და შესაძლოა ქვეყანა ინვესტორების გარეშე დატოვოს. ივანიშვილთან აუდიენციას წინ უძღვოდა შეხვედრა პრემიერ ბახტაძესთან.

კურტ ვოლკემა ბიძინა ივანიშვილთან ერთსაათიანი შეხვედრის შემდეგ, განმარტებები გააკეთა და აღნიშნა, რომ ქვეყნის უსაფრთხოებისთვის და მომავალი განვითარებისთვის, სტრატეგიულად მნიშვნელოვანია ანაკლიის პორტი და მის განვითარება.

„მთავარია, რომ კანონის უზენაესობა იყოს დაცული. მნიშვნელოვანია, კონტრაქტები, როგორ აღიქვამენ ინვესტორები საქართველოში არსებულ გარემოს. ესეც მნიშვნელოვანია თქვენი მომავალი რეპუტაციისთვის. ძალიან დიდი იმედი მაქვს, რომ ორივე მხრიდან ჭკვიანი ხალხი კანონის უზენაესობის დაცვით, სწორად მოაგვარებენ ამ საკითხს. ასე უნდა მოხდეს. დასავლეთი დიდ იმედებს ამყარებს საქართველოზე და ამიტომ, მისგანაც დიდი მოლოდინები აქვს. ანაკლიის პორტი, პირველ რიგში, საქართველოს სტრატეგიულ ინტერესებშია. როდესაც ვფიქრობთ ქვეყნის უსაფრთხოებაზე, რაღა თქმა უნდა, იგულისხმება სამხედრო უსაფრთხოება, მაგრამ ამაზე უფრო მნიშვნელოვანია დემოკრატიის გაძლიერება, რეფორმები, ეკონომიკის ზრდა, ტვირთების გადაზიდვა, ვაჭრობა. შესაბამისად, ამ პორტს აქვს პოტენციალი, სტრატეგიულად მნიშვნელოვანი იყოს საქართველოს მომავლისა და უსაფრთხოებისთვის. თქვენ ახსენეთ ამ პროექტში ჩართული ამერიკული კომპანიები. ვაშინგტონის აზრით, ჩვენ კი არ გვაქვს რაიმე განსაკუთრებული ინტერესი ანაკლიის მიმართ, არამედ ჩვენ დაინტერესებულები ვართ, საქართველო იყოს წარმატებული, პროგრესული და დაცული ქვეყანა. ამ პროექტს შეუძლია ამ ყველაფერს ხელი შეუწყოს,“ - განაცხადა კურტ ვოლკერმა.

ვოლკერი რუსეთის ეჭვებზეც საუბრობს, რომ პორტმა შესაძლოა ამერიკული წყალქვეშა გემებიც მიიღოს. ამერიკის მაკკეინის საერთაშორისო ლიდერობის ინსტიტუტის აღმასრულებელი დირექტორი ამბობს, რომ პორტი სწორედ იმისთვის არსებობს, რომ მან როგოც გემები, ასევე წყალქვეშა ნავებიც მიიღოს.

„პორტი, თავის თავად ნიშნავს, რომ უნდა მიიღოს გემებიც და წყალქვეშა ნავებიც. ამაში ახალი არაფერია,“ - აღნიშნა ვოლკერმა.

კურტ ვოლკერი იმედს გამოთქვამს, რომ ანაკლიის პორტის პროექტი განვითარების გზას დაადგება.

„მე მჯერა, რომ ეს პროექტი წინ წავა. ეს საქართველოს ინტერესებშია, რადგან ყველა მხარეს სურს. დარწმუნებული ვარ, ქართველები ამ პროექტის განხორციელების გზას გამოძებნიან,“ - აცხადებს კურტ ვოლკერი.

წყარო: "რუსთავი 2".