"გინდა ენკი-ბენკი დაარქვან, გინდ წერილი თუ სიხარული"

"გინდა ენკი-ბენკი დაარქვან, გინდ წერილი თუ სიხარული" - ხაზარაძე

პოლიტიკა - 11:49, 11 Mar, 2019

1115

მამუკა ხაზარაძეს ბიძინა ივანიშვილთან მისი, ბადრი ჯაფარიძისა და ვანო ჩხარტიშვილის შეხვედრის დეტალებზე საუბარი არ სურს და აცხადებს, რომ რადგან ივანიშვილმა დაიწყო ამის შესახებ საუბარი უმჯობესია თავად ის მოყვეს თუ რატომ შედგა შეხვედრა და ვინ ესწრებოდა მას. მამუკა ხაზარაძე ასევე არ ადასტურებს იმასაც რომ შეხვედრა მისი ინიციატივით შედგა. აღნიშნულ თემაზე ხაზარაძემ კვირის პალიტრასთან ისაუბრა:

„მიუხედავად იმისა, რომ ივანიშვილმა თქვა, ჰკითხეთ ხაზარაძესა და ჯაფარიძეს, რა ხდებოდა შეხვედრაზეო, მაინც ვფიქრობ, რადგან მან დაიწყო საუბარი, აჯობებს თავად მოჰყვეს, რატომ შედგა შეხვედრა და ვინ ესწრებოდა მას.“- განაცხადა მამუკა ხაზარაძემ.

ჟურნალისტის კითხვაზე რატომ აცხადებს ივანიშვილი, რომ ჩხარტიშვილმა მას 100:0 მოუგო, ხაზარაძემ უპასუხა რომ მას მათთან კალათბურთი არ უთამაშია და არ იცის:

„არ ვიცი, კალათბურთი არ მითამაშია. მოვა დრო და თუ არ იტყვიან, მე ვიტყვი. იმდენ საკითხზე ვილაპარაკე და არაფერზე პასუხი არ მიმიღია. პოლიტიკოსები მაბრალებენ, რომ თურმე რაღაცების გადაფარვას ვცდილობ. რას ნიშნავს გადაფარვა?! მოვყევი ის, რაც გადამხდა და გინდა ენკი-ბენკი დაარქვან, გინდ წერილი თუ სიხარული. ასეთ არასერიოზულ თემებზე სურთ ყურადღების გადატანა. ძალიან ცუდი მიმართულებით მიდიან, ეს ქვეყნისთვის ძალიან ცუდია და ვერაფერს მიაჩუმათებენ. არის ზღვარი, რომლის იქითაც არაფერს დავთმობ: ან დაადგინონ ჩემი ბრალეულობა, ან შეწყვიტონ საქმე. ამ ყველაფერმა სერიოზულად დააზიანა ქვეყნის იმიჯი. ამაზე იფიქრონ და არა იმაზე, რომელიღაც შეხვედრას ვინ ესწრებოდა.“- განაცხადა მამუკა ხაზარაძემ.