„სასაცილო, სატირალი რომ არ იყოს... ვინ უნდა მივიდეს ოცნებაში, როცა ერთ-ერთი ლიდერი ტოვებს და ამბობს, რომ მეზობლები უფრო თბილად ესალმებიან... მეტროებთან დადგებიან “- გოცირიძე

პოლიტიკა - 17:04, 08 Mar, 2019

1153

ფრაქცია "ერთიანი „ნაციონალური მოძრაობის" თავმჯდომარე რომან გოცირიძე "ქართულ ოცნებაში" ახალი კადრების შერჩევას ეხმაურება და ამბობს, რომ ივანიშვილს არ ესმის, რომ მისი არჩეული მეთოდებით ლიდერები არ იბადებიან.

"ახალი კადრების შერჩევაზე ერთს ჰგონია, რომ ახალი არის კარგად დავიწყებული ძველი და სადღაც სკივრებიდან ამოიყვანეს ძველი ე.წ გვარდია, ოღონდ ნაფტალინიც დაავიწყდათ, არც თუ ისე ლამაზად გამოიყურებიან. ხოლო, „ოცნების“ მეორე ფრთას მიაჩნია, რომ ახალი კადრების შერჩევაა კონკურსის გზით ადამიანების მოზიდვა, როგორც ჯარში ხდება რეკრუტირება.

ალბათ, მეტროებთან დადგებიან, დადგამენ მაგიდებს და დაიწყებენ მეგაფონებით გამოცხადებას - გვსურს, „ოცნებაში“ შემოვიდეს „ასეთი“ ადამიანი, „ისეთი“ ადამიანი, მაღალი - 185 სანტიმეტრი თუ საშუალოზე დაბალი, ინგლისური უნდა იცოდეს და ა.შ. შეარჩიეს ასეთი კადრები უკვე და ერთი დეპუტატი გახდა, მეორე მთავრობის წევრი და ამ კადრებმა ამ ქვეყანას რა უქნეს, ეს უკვე დავინახეთ.

ივანიშვილს უნდა მეორეჯერ შევიდეს მდინარეში და მეორეჯერ მოატყუოს ხალხი. მაშინ შეცდა საზოგადოება, შექმნა ბიძინამ 2030-ის რაღაც გაერთიანება, გამოჩეკა ინკუბატორის წიწილებივით ბარტყები, დააფრთიანა, მიმოფანტა სამინისტროებში. ომბუდსმენი არის აგერ, პარლამენტშიც სხედან 2030-ის კადრები, „ქართუს“ რესურსები ამოწურა და ლამის დარაჯებიც კი „ქართუდან“ ხელისუფლებაში მოიყვანა და აღმოჩნდა, რომ მას რაიმე სხვა რესურსი აღარ აქვს.

ბუნებრივია, პოლიტიკური შერჩევით ლიდერების ფორმირების უნარი არ აქვს ამ ხელისუფლებას. ლიდერები არ იბადებიან კონკურსის წესით, ლიდერებს ვერ შეარჩევ განცხადებით. ლიდერებს ბადებს ცხოვრება, გამოცდილება... რა მოტივი უნდა ჰქონდეს დღეს ახალგაზრდას, მივიდეს „ოცნებაში“, როდესაც ერთ-ერთი ლიდერი „ოცნებიდან“ აკეთებს განცხადებას და ტოვებს, იმიტომ რომ იქ ყოფნა უკვე ღირსების საქმედ მიაჩნია და ამბობს, რომ მეზობლები უფრო კეთილად და თბილად ესალმებიან, ვიდრე იქამდე, სანამ პარტიაში იყო. ადამიანები, რომლებიც აი, ამ გაკოტრებულ „ქართულ ოცნებაში“ მოინდომებენ მისვლას, ფაქტობრივად, ჩავთვალოთ , რომ ესენი არიან მომავალი კარიერისტები და დაემსგავსებიან იმ ადამიანებს, რომლებიც ივანიშვილმა ერთხელ უკვე მოიყვანა. მთლიანობაში ეს არის ძალიან კომიკური, ძველი გამოთქმა რომ გამოვიყენო, ეს არის სასაცილო, სატირალი რომ არ იყოს," - აღნიშნა გოცირიძემ.