ორმხრივი სროლა და მძევლად აყვანილი მამაკაცი და ქალი - საქართველოს ბანკის დაყაჩაღების ახალი დეტალები

კრიმინალი - 15:05, 08 Mar, 2019

3052

მასშტაბური ყაჩაღობა და რამდენიმე მძიმე დანაშაული ერთდროულად - სმართალდამცავები მთელი ქვეყნის მასშტაბით ეძებენ სამ ნიღბიანს, რომელიც დღეს 10:30 საათზე გლდანში მდებარე "საქართველოს ბანკის" ფილიალს ყაჩაღობის მიზნით თავს დაესხა, ადგილზე გამოძახებულ პოლიციას ცეცხლი გაუხსნა და ორი პირი გაიტაცა.

როგორც ირკვევა, 30 წლის ზურა ბერიკაშვილი ერთ-ერთი გატაცებულია, რომელიც ბოროტმოქმედებმა გუშინ აიყვანეს მძევლად და მისივე ავტომობილში "სუბარუში" ხელ-ფეხ შეკრული მთელი ღამის განმავლობაში დატოვეს.

ბოროტმოქმედები გლდანის მეექვსე მიკრო-რაიონში სწორედ ზურაბ ბერიკაშვილის ავტომობილით მივიდნენ. თუმცა ადგილზე პოლიციის გამოჩენის შემდეგ, ახალგაზრდა ქალი აიყვანეს და სწორედ მისი გამოყენებით დატოვეს ბანკის მიმდებარე ტერიტორია. საბოლოოდ კი, მძევლად აყვანილი გოგონა, ქერჩის ქუჩაზე დატოვეს, ბერიკაშვილი კი მეოთხე მიკრო რაიონში დატოვეს.

ორივე გატაცებულს ამ წუთებში პოლიციაში კითხავენ.

ყაჩაღობა გლდანში „საქართველოს ბანკის“ ფილიალზე 10:30 საათზე მოხდა. არსებული ინფორმაციით, მათ ბანკიდან თანხის წაღება ვერ შეძლეს, რადგან ადგილზე პოლიცია გამოცხადდა.

შსს-ს მიერ გლდანში, „საქართველოს ბანკზე“ თავდასხმის ფაქტზე გამოძიება სამი მუხლითაა დაწყებული.

ეჭვმიტანილებს ყაჩაღობის, თავისუფლების უკანონოდ აღკვეთისა და იარაღის უკანონოდ შეძენა-შენახვის მუხლებით გათვალისწინებულ დანაშაულს ედავებიან.