ეკა ბესელია „თიბისი ბანკის” საქმესთან დაკავშირებით პარლამენტის საგამოძიებო კომისიის შექმნას მხარს უჭერს. დეპუტატის თქმით, პარლამენტს შეუძლია შექმნას დროებითი ან საგამოძიებო კომისია, რომლითაც უნდა გაირკვეს, რომელი მხარეა მართალი.

„ჩვენ უტყუარად ვერ ვიტყვით, ბრალდებები, რაც ბატონი ხაზარაძის მხრიდან ისმის, სარწმუნოა თუ არ არის სერიოზული. ყველა შემთხვევაში, იმისთვის, რომ საკითხი არ დარჩეს ღია და არ გამოიწვიოს კითხვები და ეჭვები, რომელიც მიმართულია ძალიან მაღალი პოლიტიკური თანამდებობის პირების მიმართ, ამას სჭირდება საპარლამენტო კონტროლი და ზედამხედველობა. იმ პირობებშიც კი, გამოძიება რომ აბსოლუტური მიუკერძოებლობით ჩატარდეს, საზოგადოებაში მაინც გამოჩნდებიან ადამიანები, ვისაც ექნებათ განცდა, ეჭვი შეიტანონ მიუკერძოებლობაში იმიტომ, რომ საქმე ეხება მაღალი თანამდებობის პირებს. ამიტომ, მე არ შევხედავდი ასე იუმორით ამ წერილს და განცხადებებს. მთლიან კონტექსტს თუ შევხედავთ, მე მგონია, რომ საჭიროა პარლამენტი დაინტერესდეს, შესწავლა დაიწყოს და შესაბამისი საპარლამენტო საკონტროლო მექანიზმების გამოყენებით, ამ საკითხის სიღრმისეული ანალიზი მოხდეს. იმის გამო, რომ არც ერთი მხარე ვართ ჩვენ და არც მეორე, არც ერთი პოზიცია მიგვაჩნია უტყუარად და არც მეორე პასუხები მიგვაჩნია დამაჯერებლად, ჩვენი პოზიციაა, რომ საპარლამენტო კონტროლი განხორციელდეს და ამ იდეას დავუჭერდი მხარს. საჭიროა პარლამენტმა შექმნას ისეთი კომისია, იქნება ეს საგამოძიებო თუ დროებითი, დაიწყოს საკითხის შესწავლა, რათა გაირკვეს ვინ არის მართალი,“ - ამბობს ბესელია.