ზურაბიშვილი ცილისწამებისა და ცრუ ინფორმაციების წინააღმდეგ ბრძოლის გზად საინფორმაციო და სოცქსელების ჩარჩოებში მოქცევას მიიჩნევს

პოლიტიკა - 13:35, 06 Mar, 2019

562

საქართველოს პრეზიდენტმა პირველი საპარლამენტო გამოსვლისას ცილისწამებისა და ცრუ ინფორმაციების გავრცელების საკითხზე ისაუბრა და განაცხადა, რომ ქვეყანაში პოლარიზაციის პრობლემის მოგვარება ვერ მოხდება, თუ საინფორმაციო და სოციალურ ქსელებში განვითარებულ პროცესები რაიმე ჩარჩოში არ მოექცევა.

„ძალადობრივი გარემო თითოეული ადამიანის ცხოვრებაში აღწევს. საზოგადოება ელოდება ამ ვითარების ჩაცხრობას. მას სჭირდება დამშვიდება და შერიგება. ეს შეუძლებელი იქნება, თუკი რაიმე ფორმით ცივილურ ჩარჩოებში არ მოვაქცევთ საინფორმაციო და სოციალურ ქსელებში განვითარებულ პროცესებს, – დეზინფორმაციის, ცილისწამების, სიძულვილის ენის, პირადი ცხოვრების კადრების ნიაღვარი უნდა შევაჩეროთ. როდესაც მედიასივრცე მოცულია დამახინჯებული და ყალბი ცნობებით, ჩნდება უნდობლობა ყველანაირი ინფორმაციის მიმართ. ამის შედეგად საზოგადოება ინფორმაციის მიღმა შეიძლება დარჩეს, რაც მას ართმევს ანალიზის საშუალებას, გზას უხსნის შეთქმულების თეორიებს და აყალიბებს ძალადობრივ გარემოს. დაცული და ობიექტური ინფორმაციის გარეშე ვერც დემოკრატიული სისტემა და ვერც სახელმწიფო სტაბილურობა ვერ შენარჩუნდება.“ – განაცხადა სალომე ზურაბიშვილმა.