"ღარიბაშვილი “ქართული ოცნებისთვის” მეორე სუნთქვა იქნება" - ჯაჭვლიანი და ლორთქიფანიძე "ოცნების" ე.წ ახლებს აკრიტიკებენ

პოლიტიკა - 12:44, 06 Mar, 2019

953

პარლამენტის ყოფილმა წევრებმა სოსო ჯაჭვლიანმა და დავით ლორთქიფანიძემ დღეს პრესკონფერენცია გამართეს და „ქართულ ოცნებაში“ მიმდინარე მოვლენები შეაფასეს. „ოცნების“ ე.წ ძველი გუნდის წარმომადგენლებმა ახლების გუნდის პოლიტიკა გააკრიტიკეს და დადებითად შეაფასეს ირაკლი ღარიბაშვილის პოლიტიკაში დაბრუნება.

სოსო ჯაჭვლიანის თქმით, ღარიბაშვილი არის ადამიანი, ვისთან ერთადაც შექმნეს “ქართული ოცნება” და იციან მისი განწყობის შესახებ.

„ ჩვენ არ ვართ მიტოვებულები, ჩვენ ვართ სახტად დარჩენილები. ყველაფერი, რაც დღეს ქვეყანაში ხდება, ჩემში გაკვირვებას იწვევდა. “ქართული ოცნება” ხელისუფლებაში 2012 წელს მოვიდა. არ დავიწყებ იმ დაპირებებზე ლაპარაკს, რასაც ამომრჩეველს ვპირდებოდით, მაგრამ ფაქტია, რომ ხალხი დღეს, განაწყენებულია. ჩვენთვის პარტიის კარი არასდროს ყოფილა დაკეტილი, მაგრამ მოხდა ისე, რომ ის ადამიანები, ვინც ჩვენი თანამებრძოლები იყვნენ და ჩვენთან ერთად ებრძოდნენ “ნაციონალურ მოძრაობას”, ყველა ჩამოიშორეს. საპრეზიდენტო არჩევნების პირველი ტური რომ ჩატარდა, ბიძინა ივანიშვილი აზეიმეს გამარჯვება. გუნდმა, რომელიც ამ არჩევნებზე მუშაობდა, ფაქტობრივად მოატყუა ივანიშვილი. მათ ასეთი გათვლა გააკეთეს, ხმების 25% -ს არჩევნებში ადმინისტრაციული რესურსით მიიღებდნენ, ხოლო დანარჩენი 30% მოსახლეობაში გარანტირებული მხარდამჭერი ეყოლებოდათ. მაგრამ ასე არ მოხდა. საღამოს 8 საათზე საარჩევნო უბნები როცა დაიხურა, სულ სხვა რეალობა დადგა. შეცდომაში შეიყვანეს ბიძინა ივანიშვილი და უთხრეს 53-54% -ით ვიგებთ არჩევნებსო. ივანიშვილს, რომ სცოდნოდა არჩევნებს ვერ იგებდა, სულ სხვა გადაწყვეტილებას მიიღებდა. მე კიდევ მაქვს იმედი, რომ ყველაფერი დალაგდება, რათა მომავალი საპარლამენტო არჩევნები ამომრჩევლისთვის მისაღები იყოს.“- განაცხადა სოსო ჯაჭვლიანმა.

ანალოგიური განცხადება გააკეთა დავით ლორთქიფანიძემაც, მისი თქმით „ქართულ ოცნებაში“ არსებული პრობლემა მალვის მიუხედავად მაინც ცხადი გახდა:

„განაწყენებული ადამიანების რიგში ნამდვილად არა ვართ იმიტომ, რომ თავიდანვე ვიყავით ყველა იმ პერიპეტიაში ჩართული რასაც ქვია პარტიული ცხოვრება. ჭირმა თავი არ დამალაო ნათქვამია, ბუნებრივია ძალიან ბევრი ადამიანი, ჩვენი თანამებრძოლებისა 2011 წლიდან მოყოლებული და არა 2012-დან, არის ძალიან გულნატკენი, აქ არის საუბარი იმ ადამიანებზე, რომლებიც ქმნიან ამინდს რეგიონებში. ამ ადამიანების უკან მობრუნება და მათი გამოყენება არის ძალიან მნიშვნელოვანი.“- განაცხადა დავით ლორთქიფანიძემ.