"სახელმწიფოს მიტაცების ტენდენცია"- მესამე სექტორი ხაზარაძისთვის გაგზავნილი წერილის გასაჯაროებას და საგამოძიებო კომისიის შექმნას მოითხოვს

პოლიტიკა - 15:44, 05 Mar, 2019

690

TBC ბანკის ერთ-ერთი დამფუძნებლის მამუკა ხაზარაძის სკანდალურ განცხადებებს, რომელიც შს მინისტრის მხრიდან მუქარას შეეხებოდა მესამე სექტორი ეხმაურება.

არასამთავრობოები აღნიშნავენ, რომ ეს ბიზნესზე ზეწოლის პირველი შემთხვევა არ არის და ადგილი აქვს სახელმწიფოს მიტაცების მზარდ ტენდენციებს.

არასამთავრობო ორგანიზაციები ითხოვენ, გაასაჯაროოს მამუკა ხაზარაძემ შს მინისტრისგან მიღებული წერილი და ასევე ითხოვენ შეიქმნას საპარლამენტო საგამოძიებო კომისია.

"ბოლო წლების განმავლობაში ეს არ არის პირველი შემთხვევა, როდესაც ბიზნესმენები ხელისუფლების წარმომადგენლებისა თუ მმართველ პარტიასთან დაკავშირებული გავლენიანი პირების მხრიდან ზეწოლაზე საუბრობენ. თუ ხაზარაძის განცხადებას უფრო ფართო კონტექსტში განვიხილავთ, ის კიდევ უფრო ამყარებს ჩვენ მიერ არაერთხელ გამოთქმულ შეშფოთებას არაფორმალური მმართველობის ნიშნებისა და სახელმწიფოს მიტაცების მზარდი ტენდენციის შესახებ, რაც მოიცავს დიდი ძალაუფლების კონცენტრაციას მმართველი პარტიისა და გავლენიანი პირების არაფორმალური დაჯგუფების ხელში და მათ მიერ საჯარო ინსტიტუტების გამოყენებას კერძო მიზნებისა და ინტერესებისთვის.

რადგან არ გვაქვს იმედი რომ სამართალდამცავი უწყებები მოახდენენ მამუკა ხაზარაძის განცხადებებზე ადეკვატურ რეაგირებასა და მიუკერძოებელ გამოძიებას მოვუწოდებთ საქართველოს პარლამენტს - შექმნას დროებითი საგამოძიებო კომისია, რომელიც უზრუნველყოფს საკითხის დეტალურ შესწავლას საჯარო სხდომებზე,"-ნათქვამია არასამთავრობოების ერთობლივ განცხადებაში.