ომბუდსმენის აპარატი TBC ბანკის საქმის შესწავლას იწყებს. ამის შესახებ ნინო ლომჯარიამ ჟურნალისტებს განუცხადა.

მისი თქმით, ის მამუკა ხაზარაძესა და ბადრი ჯაფარიძეს შეხვდა. ნინო ლომჯარიას თქმით, შს მინისტრის შესაძლო მუქარის წერილზე საკომიტეტო მოსმენიდან გაიგო. მისივე თქმით, მზადაა აღნიშნული საკითხიც შეისწავლოს.

" ჩვენ ვისაუბრეთ ამ საკითხების გარშემო. ვფიქრობ რაც მოვისმინე როგორც მათთან შეხვედრაზე, ასევე გუშინ, საკომიტეტო მოსმენაზე, ნამდვილად არის ის საკითხები რაც ექცევა ადამიანის უფლებათა დაცვის ქვეშ. ამიტომ, სახალხო დამცველის აპარატმა მიიღო გადაწყვეტილება დაიწყოს ამ საკითხის შესწავლა.

რამდენიმე მიმართულებაზე ვფიქრობთ, თუმცა ამ ეტაპზე ჩვენ გვჭირდება დამატებითი ინფორმაცია გამოვითხოვოთ შესაბამისი უწყებებიდან და შემდგომ უკვე ჩამოვყალიბდებით კონკრეტულად რა მიმართულებით წავიდეთ. ერთ-ერთი მიმართულება შეიძლება იყოს იყო თუ არა დისკრიმინაციული მიდგომა ამ პირების მიმართ სახელმწიფო ორგანოების მხრიდან,” -განაცხადა ლომჯარიამ.