"ხომ შეიძლება ახალმა პოლიტიკურმა ხელმძღვანელმა თქვას, რომ ეს იყო არასწორი" - ხაზარაძის პარალელები თიბისის 2008 წლის ტრანზაქციასა და სესხების განულებას შორის

პოლიტიკა - 15:42, 04 Mar, 2019

923

„თიბისი ბანკის“ დამფუძნებელმა მამუკა ხაზარაძემ პარლამენტში გამოსვლისას პარალელები გაავლო 17 მლნ-იან ტრანზაქციასა და ე.წ. „სესხების განულების“ სამთავრობო პროგრამას შორის. მისი თქმით, ამ პროგრამასთან დაკავშირებით მას საქართველოს ეროვნულ ბანკთან კითხვები ჰქონდა, მაგრამ სები-სგან პასუხი არ მიუღია. თიბისის დამფუძნებლის განცხადებით ბანკს 120 მლნ სესხები 3 მლნ ლარად ჩამოაწერინეს.

„ჩვენ მივმართეთ ოფიციალური წერილით ეროვნული ბანკის პრეზიდენტს და ვუთხარით, თქვენ რომ გვეუბნებით, რომ ჩვენი 120 მლნ-იანი პორტფელი ამ მილიარდ 500 მილიონში უნდა ჩამოვწეროთ, 3 წლის მერე ახალი სებ-ის პრეზიდენტი რომ მოვა, ხომ შეიძლება მანაც უკანა რიცხვით თქვას ან ჩემმა აქციონერმა ნიუ-იურკში თქვს, რომ რატომ ჩამოწერეთ 120 მლნ 3 მილიონად?! ჩვენ სულ სხვა გათვლები გვქონდა, ჩვენ არ ვთვლით, რომ ეს 120 მლნ გასანულებელი იყო. კითხვა მაქვს, თუ თქვენ 2008 წლის 17 მლნ-ზე გაქვთ პრეტენზია, 5 წლის მერე ხომ შეიძლება ახალმა პოლიტიკურმა ხელმძღვანელმა თქვას, რომ ეს იყო არასწორი 120 მილიონიანი ჩამოწერა? სებ-ისგან წერილი მივიღეთ, რომ ეს ჩვენი საკითხი არ არისო. ლოგიკა სად არის?! თუმცა ისინი ყველა შეხვედრაზე ესწრობოდნენ ფინანსთა სამინისტროთან ერთად.“ - განაცხადა ხაზარაძემ.

შეგახსენებთ, 2018 წლის ბოლოს საქართველოს მთავრობის გადაწყვეტილებით, ე.წ. „შავ სიაში“ მოხვედრილ 600 000-ზე მეტ მოქალაქეს საბანკო დავალიანება გაუნულდა.