დაზიანებული გზები და ჩახსნილი ელექტროსადენები - ქობულეთიდან ივანიშვილს 3 გიგანტური ხე მიაქვს

პოლიტიკა - 15:20, 02 Mar, 2019

1516

ბიძინა ივანიშვილს თავისი დენდროლოგიური პარკისთვის ხეები ამჯერად ქობულეთის სოფელ ზენითიდან მიაქვს, ადგილობრივების განცხადებით ხეების ტრანსპორტის გამო სოფლის გზებზე მოიჭრა ნარგავები, ჩაიხსნა ელექტრო სადენები, რის გამოც მოსახლეობას 4 დღის განმავლობაში ელექტროენერგია არ მიეწოდებოდა.

„არაა აი სწორი ამბავი, სინათლეები გათიშული, წყალი გათიშული. აღარ ეშველა ამ ამბავს, ნახეთ რამდენი იჭრება... შენელდეს უნდა რამენაირად ამ კაცის პოზიცია. გაგვანადგურა მთლად.“- განაცხადა ზენითის მკვიდრმა.

აღნიშნულ პროცესს გამოეხმაურა ოპოზიციაც, მათი თქმით, ხეების გადატანის პროცესში ჩართულები არიან საჯარო სექტორის წარმომადგენლებიც:

„ბიძინა ივანიშვილი რომ საუბრობდა ერთი წელი მადროვეთო, ალბათ გულისხმობდა ამას, რომ ერთ წელწადში ამოწურავს ხეების თრევის პროცესს. რასაც ისურვებს ერთი კაცი კეთდება ისე და სამწუხაროდ ადგილობრივი მუნიციპალიტეტის ხელმძვანელობა, საკრებულოს თავმჯდომარე, მერი, პოლიციის უფროსი, სუსის უფროსი, ყველა ემსახურება მხოლოდ ხეების ტრანსპორტირებას.“- განაცხადა ქობულეთის მუნიციპალიტეტის საკრებულოს წევრმა ნაციონალური მოძრაობიდან ბონდო თედორაძემ.

სოფელ ზენითში ამ დროისთვის ტრანსპორტირებისთვის გამზადებულია 3 გიგანტური ხე.