რითი აშანტაჟებს გახარია სასულიერო პირებს - მეუფე იაკობი დეკანოზ მამალაძის წერილის შინაარსს ამხელს (ვიდეო)

პოლიტიკა - 21:34, 02 Mar, 2019

5502

პატრიარქის ქორეპისკოპოსი შაბათის კურიერთან შს მინისტრის მხრიდან წამოსულ შანტაჟზე, მსჯავრდებული სასულიერო პირის სკანდალურ წერილზე და ამერიკაში გამართულ შეხევდრებზე საუბრობს.

მორიგი სკანდალი საპატრიარქოში - შინაგან საქმეთა მინისტრმა სასულიერო პირებზე კომპრომატების მოპოვების არაფორმალური ბრძანება გასცა. ფარული ვიდეო და აუდიოჩანაწერები უნდა იყო ისეთი, რომ მღვდლების მიმართ საზოგადოების ნდობა შემცირდეს და სასულიერო პირებმა ხალხზე გავლენა დაკარგონ.

ეს სკანდალური ამბავი კურიერს ორმა დამოუკიდებელმა წყარომ დაუდასტურა. პირველი მეუფე იაკობის გარემოცვის წევრია, მეორე კი საპატრიარქოს ერთ-ერთი წარმომადგენელი.

პატრიარქის ქორეპისკოპოსთან დაახლოვებული პირი ყვება, რომ გახარიამ მღვდლებზე კომპრომატების მოპოვების დავალება სამინისტროს მაღალჩინოსნებს მისცა, ერთ-ერთმა პოლიციელმა კი ინფორმაცია მეუფე იაკობამდე მიიტანა.

სწორედ ამის გამო, 29 დეკემბერს პატრიარქის ქორეპისკოპოსმა გიორგი გახარიაზე შტურმი მიიტანა. თქვა, რომ მინისტრმა წითელი ხაზები გადაკვეთა, ის რუსეთია კაცია და, თუ გახარია პრემიერობას გადაწყვეტს, მაშინ სამღვდელოება მას დაამხობს.

ყველაფერი მარიხუანას კულტივაციის შესახებ კანონით დაიწყო, როდესაც მეუფე იაკობის ორგანიზებულ მღვდლების ამბოხებას, მაშინ გახარიას ინიცირებული მარიხუანას პლანტაციების გაშენების პროექტი შეეწირა. შინაგან საქმეთა სამინისტროში გახარიამ საგანგებო თათბირი დანიშნა.

კურიერის წყაროს ცნობით, შეხვედრის ერთ-ერთმა მონაწილემ მეუფე იაკობს უთხრა, რომ მინისტრმა მათ გავლენიან მღვდელმთავრებსა და რიგით მღვდლებზე კომპრომატების მოგროვება დაავალა. ბრძანების თანახმად, უნდა ამოეღოთ არქივში შენახული ძველი კომპრომატები და ფარულად გადაეღოთ ახალი.

მეუფე იაკობია ახლა ამერიკაშია. ექსკლუზიური ინტერვიუ კურიერის სასულიერო პირმა კაპიტოლიუმის მოედანზე კონგრესში შეხვედრების წინ მისცა.

„კომპრომატებს გააჩნია, რას უწოდებ. მე არ ვიცი, შსს-მ რა უნდა ქნას კომპრომატით, გინდ შსს-მ, გინდ რუსეთმა“ - ამბობს მეუფე იაკობი.

კურიერის მეუფე იაკობის გარემოცვის წევრები უყვებიან, რომ მას შემდეგ რაც მღვდელმთავარი შინაგან საქმეთა მინისტრს დამხობით დაემუქრა და მას რუსეთის კაცი უწოდა, განცხადებას მთავრობაში პანიკა მოჰყვა.

მეუფესთან შუამავლები მივიდნენ, ბოდიში მოუხადეს და უთხრეს, რომ გახარია მსგავს ნაბიჯს არ გადადგამდა. დროებითი ზავი შედგა, თუმცა, მეუფე იაკობი შსს მინისტრის მაინც არ შეხვდა. მეუფე განმარტავს, რომ ძალიან დაკავებულია და მინისტრი ამ მიზეზით ვერ ნახა.

სკანდალურ ინტერვიუში მეუფე იაკობი ქვეყნის პირველ პოლიციელს რუსეთის კაცს უწოდებს. კურიერთან პატრიარქის ქორეპისკოპოსი ამ მძიმე პოლიტიკურ ბრალდებას აღარ იმეორებს.

მეუფე იაკობის გარემოცვიდან სანდრო წყარო კურიერს უყვება იმ საუბრის შინაარსს, რომელიც მეუფე იაკობსა და სხვა მღვდელმთავრებს შორის შედგა, რომლებმაც ჰკითხეს, რა იცის გიორგი გახარიას რუსული კავშირების შესახებ. პატრიარქის ქორეპისკოპოსმა მაშინ მათ აუხსნა, რომ რუსეთის კაცში გულისხმობდა ბრძოლას რუსული მეთოდებით, რადგან სწორედ რუსული ხელწერაა მღვდლების ფარულად გადაღება და მათი დაშანტაჟება.

„თუ ძველად აგროვებდნენ, რუსეთის დროს, საბჭოთა კავშირის დროს აგროვებდნენ, მერე ახლა, გაგრძელდა თუ არა ხელისუფლებაში ეს, ვერ გეტყვით. რელიგიის საბჭო აღარ არსებობს, მასეთი უწყება ხილულად არ არის დღესდღეობით,“ - ამბობს მეუფე.

დეკანოზ მამალაძის წერილთან დაკავშირებით მეუფე სხვა სასულიერო პირებისგან განსხვავებულ განცხადებას აკეთებს და ამბობს, რომ დეკანოზის წერილი საპატრიარქოში ხმამაღლა წაიკითხეს.

დღემდე ცნობილი იყო, რომ ციხიდან გამოგზავნილი წერილი, მხოლოდ 4-მა მღვდელმთავარმა მიიღო და ღიად ვერცერთი ვერ ბედავდა ეთქვა, რა წერია გზავნილში. პატრიარქის ქორეპისკოპოსის ინტერვიუდან კი გაირკვა, რომ წერილი საპატრიარქოში ხმამაღლა წაიკითხეს.

„ეს ახალი წერილი კი არ არის. თუ ვინმე ამბობს, რომ არ ვიცი, რა წერია წერილშიო, იტყუება. არაფერი ისეთი არ წერია. როდესაც ერთ-ერთმა ეპისკოპოსმა წაგვიკითხა, იქვე დაიბადა აზრი, რომ ასეთი ადამიანი არ შეიძლება, სასულიერო პირი იყოსო. ერთია, რომ წერ, მახარებელი ხომ არ არის, რომ რასაც წერს, ყველაფერი დაუჯერო, ხომ უნდა დამტკიცო, რასაც წერ - შანტაჟი არის ჩვეულებრივი. თუ არ გამომიშვებენ, რაღაცები მაქვს და გამოვაქვეყნებ. გამოაქვეყნოს, რაც უნდა. უშუალოდ, კონკრეტული ფაქტები არ არის, ზოგადად ლაპარაკობს კორუფციაზე, ზოგადად ლაპარაკობს, ჭირვეულივით არის. თუ არ გამომიშვებთ, ამას ვიზამ, იმას ვიზამო. გააკეთოს, რაც უნდა,“ - ამბობს მეუფე იაკობი.

ირკვევა, რომ მამა გიორგი მამალაძის წერილი ერთ-ერთმა მღვდელმთავარმა საპატრიარქოში წაიკითხა, შემდეგ კი მათ მიიღეს გადაწყვეტილება, რომ ამ წერილის შინაარსი პატრიარქსაც უნდა სცოდნოდა.

რა წერია პატიმარი მღვდლის წერილში, კორუფციის გარდა, მეუფე იაკობმა კამერის წინ დეტალები არ გაამხილა. მხოლოდ იმას ამბობს, რომ საუბარია კომპრომატებზე, რომელსაც მღვდელი სასულიერო პირებზე ფლობს.

„რომელ კომპრომატზეა საუბარი, შეშინებული კაცია ციხეში, სასულიერო პირი არ უნდა იხვეწებოდეს, ციხიდან გამიშვიო. ტყუილად რომ იყოს დაჭერილი, ხომ, ზოგიერთი სასულიერო პირი მაგას მოწამეს უწოდებს, ხოდა, თუ მოწამეა და აღმსარებელი, მაგის ჯვარს ტოვებს და გარბის იქიდან? თუ შენდობას ითხოვს, როგორც ითქვა, თავის წილ იმაზე, მაშინ ჩვენ გაგებით მოვეკიდებით ამას. თუ ასე ილაპარაკა მუქარით, გამოაქვეყნოს. ეგ გადასაწყვეტია პრეზიდენტის და თუ შეიწყალებს, არავის უფლება არა აქვს, მერე თქვას, რატომ შეიწყალაო. იმიტომ, რომ დისკრეცია იმის არის,“ - ამბობს მეუფე.

წყარო rustavi2.ge