უფასო ელექტროენერგია ოკუპირებულ აფხაზეთს და რუსულ ბაზებს საქართველოს ბიუჯეტის ხარჯზე - ოპოზიცია რუსეთთან დადებული ხელშკერულების გასაჯაროებას ითხოვს

პოლიტიკა - 13:30, 01 Mar, 2019

1101

გაერთიანებული ოპოზიცია "ძალა ერთობაშიას" წევრი, სალომე სამადაშვილი აცხადებს, რომ ეკონომიკის მინისტრისა და ხელისუფლების გადაწყვეტილებით საქართველო ოკუპირებულ აფხაზეთს ელექტროენერგიით მომარაგებს.

"ნაციონალური მოძრაობის" ერთ-ერთი ლიდერის თქმით, უკვე გაფორმდა შესაბამისი ხელშეკრულება რუსულ კომპანიასთან, რომლის მიხედვითაც 45 მლნ.კილოვატ საათის ელექტროენერგიის შესყიდვას საქართველოს მოსახლეობის ფინანსებით გეგმავს.
ცნობისათვის, თებერვლის პირველ კვირაში, ოკუპირებულ გალის რაიონში, „ვარდნილჰესი 1-ის“ ტერიტორიაზე, სეპარატისტთა ინიციატივით, საქართველოს ელექტოენერგიის გადამცემი ოპერატორის „სახელმწიფო ელექტროსისტემის“ (სსე) და ელექტროენერგეტიკული სისტემის კომერციული ოპერატორის (ესკო) პირველ პირებთან დახურული შეხვედრა გაიმართა. მოლაპარაკების თემა ენერგოდეფიციტის აღმოფხვრის გზების მონახვა იყო.
ოპოზიციას ეჭვი აქვს, რომ სახეზეა კერძო ინტერესები და შესაბამისად, ისინი აღნიშნული ხელშეკრულების გასაჯაროებას მოითხოვენ.
სამადაშვილი ამბობს, რომ საქართველოს ხელისუფლებისთვის რუსული ინტერესები უფრო პრიორიტეტულია.

"მაშინ როდესაც რუსეთი ყველანაირად ამყარებს ოკუპაციას და ანექსიას ჩვენი ოკუპირებული ტერიტორიების, ზრდის საკუთარ სამხედრო ინფრასტრუქრუქტურას ამ რეგიონებში, აღმოჩნდა, რომ საქართვველოს ხელისუფლებამ, მინისტრმა ქობულიამ მიიღო გადაწყვეტილება, ფაქტობრივად სუფსიდირება გაუკეთოს საქართველოს ოკუპირებული რეგიონის ენერგოსისტემას, ქართველი გადასახადების გადამხდელთა ჯიბიდან.

როგორც ჩვენთვის გახდა ცნობილი, ქობულიას დავალებით, გაფორმდა ხელშეკრულება, რუსეთიდან 45 მლნ.კილოვატ საათის ელექტროენერგიის შესყიდვისა და უფასოდ მიწოდების შესახებ აფხაზეთის ტერიტორიისთვის. რასაც განახორციელებს საქართველოს ენერგოოპერატორის "ესკოს" და რუსული კომპანია"ინტერ-რაოს" შორისგაფორმებული ხელშეკრულების საფუძველზე. ჩვენ ენგურჰესის მეშვეობით უკვე ვუკეთებდით სუბსიდირებას აფხაზეთის ენერგო სისტემას 55 % მიეწოდებოდა სწორედ აფხაზეთის ოკუპირებულ ტერიტორიას, თუმცა როგორც ჩანს ახლა გაჩნდა დეფიციტი და ამ დეფიციტის დასაფარად, უკვე 7 მილიონი დაიხარჯა საქართველოს ბიუჯეტიდან დღევანდელი ხელისუფლების მიერ.

იმის გათვალისწინებით, რომ გადასახადების გადამხდელების სახსრები, გამოიყენება საოკუპაციო რეჟიმის დახმარებისთვის, საოკუპაციო რეჟიმის სუფსიდირებისთვის, უფლება გვაქვს, მოვითხოვოთ ამ დოკუმენტების ყველა დეტალების გასაჯაროება და საზოგადოებამ თავად უნდა განსაჯოს, რამდენად შედის სახელმწიფო ინტერესებში მსგავსი ხელშეკრულების გამორმება. იმიტომ, რომ საკითხავია, რას იღებს ჩვენი სახელმწიფო სანაცვლოდ. მაშინ როდესაც ჩვენ ვხვდებით, რომ სულ უფრო აგრესიულ განცხადებებს აკეთებს რუსეთის ხელისუფლება. რეალურად არანაირი პროგრესი არ გვაქვს დეოკუპაციის თვალოსაზრისით და ამ დროს ჩვენ ჯიბიდან ფაქტობრივად ვაფინანსებთ რუსი სამხედროების ბაზებს მათ შორის ოკუპირებულ აფხაზეთში.
ჩვენ გამოვითხოვეთ ინფორმაცია შესაბამისი უწყებებიდან, თუმცა ისინი ამ ეტაპზე არ ასაჯაროვებენ. გვაქვს საფუძვლიანი ეჭვი, რომ საქმე გვაქვს კერძო ინტერესთან, როგორც ჩანს, რაღაც კავშირები არსებობს რუსულ კომპანიებთან და რუსული კომპანიების და რუსეთის საოკუპაციო რეჟიმის ინტერესები ბევრად უფრო პრიორიტეტულია დღევანდელი ხელისუფლებისთვის, ვიდრე ის თუ რაში დაიხარჯება ჩვენი გადამხდელების სახსრები, მაშინ როდესაც უზარმაზარი გამოწვევების წინაშე დგას ჩვენი საზოგადოება და ჩვენი ქვეყანა.
მივმართავთ ხელისუფლებას, გაასაჯაროვოს ხელშეკრულებების დეტალები, ეს ჩვენი უფლებაა ვიციდეთ რაში იხარჯება ჩვენს მიერ გადახდილი გადასახადები"- აცხადებს სამადაშვილი.