„თიბისი ბანკის“ საქმე - დამფუძნებლებს მამუკა ხაზარაძესა და ბადრი ჯაფარიძეს დღეს, ამჯერად პარლამენტის საფინანსო-საბიუჯეტო კომიტეტის სხდომაზე მოუსმენენ. კომიტეტის თავმჯდომარის, ირაკლი კოვზანაძის განცხადებით, საქართველოს პარლამენტი არის ღია სტრუქტურა და საფინანსო-საბიუჯეტო კომიტეტზე „თიბისი ბანკის“ საქმის განხილვა მოხდება.

„ჩვენ ვპასუხობთ მამუკა ხაზარაძისა და ბადრი ჯაფარიძის წინადადებას, რომ მათ აქვთ სურვილი მოვიდნენ პარლამენტში, წარმოადგინონ თავიანთი ხედვები და წინადადებები, რაც მათ ჰქონდათ „თიბისი ბანკთან“ დაკავშირებით. დღეს მე ვაცხადებ – ეს შეხვედრა შეიძლება შედგეს ორშაბათს, 12:00 საათზე, გვქონდა გარკვეული კონტაქტები და შევთანხმდით, დანარჩენ დეტალებს ადგილზე გაარკვევთ“, – განაცხადა ირაკლი კოვზანაძემ.