უნდა ვიცოდეთ ივანიშვილი რა უფლებამოსილებით აგზავნის გზავნილებს რუსეთში, რატომ ვაჭრობს საქართველოს სახელით?!- ოპოზიცია

პოლიტიკა - 12:29, 28 Feb, 2019

1339

აბაშიძე-კარასინის ფორმატის გაქუმებას ითხოვს ოპოზიცია. მათი შეფასებით, ეს დიალოგი საიდუმლო შეხვედრად გადაიქცა. ხელისუფლების ოპონენტების თქმთ, რუსეთის საგარეო საქმეთა სამინისტროს მოადგილე საჯაროდ ემუქრება საქართველოს.

ოპოზიციას ასევე აინტერესებს, კარასინთან შეხვედრამდე რა სტატუსით შეხვდა პარტია „ქართული ოცნების“ თავმჯდომარე, ბიძინა ივანიშვილი ზურაბ აბაშიძეს.

„ბატონმა აბაშიძემ თქვა, რომ მას პირად შეხვედრაში არანაირი მუქარა არ მიუღია ბატონი კარასინისგან, მაშინ, როდესაც კარასინმა ეს მუქარა საჯაროდ გააჟღერა. მუქარა შეიძლება ეხებოდეს, როგორც ღრმაწყლოვან პორტს ანაკლიაში, ასევე საქართველო-ნატო-ს ურთიერთობებს, საქართველო-ევროკავშირის ურთიერთობებს. ამის გადატანა პირად საუბარში მუქარის არარსებობის კონტექსტში არის სასაცილო. მეორე, რაც შეეხება იმ გზავნილებს, რომელიც მიიღო კარასინმა ივანიშვილისგან, ეს არის სერიოზული საკითხი. ჩვენ უნდა ვიცოდეთ მმართველი პარტიის ხელმძღვანელი რა უფლებამოსილებით აგზავნის რაიმე გზავნილს რუსეთში,“ - განაცხადა „ევროპული საქართველოს“ წევრმა, სერგი კაპანაძემ.

ალეკო ელისაშვილის შეფასებით კი, ბიძინა ივანიშვილი საქართველოს სახელით რუსეთთან ვაჭრობს.

„ბიძინა ივანიშვილი რატომ ვაჭრობს საქართველოს სახელით, ვინ არის თანამდებობრივად, უფლებამოსილების მიხედვით, კონსტიტუციურად ვინ არის ეს კაცი, რომ რუსეთს მესიჯებს უგზავნის. ერთი კაცი, რომელიც პარტიის თავმჯდომარეა. პრეზიდენტია, პრემიერია, რამე ოფიციალურ თანამდებობა აქვს, რა ხდება ჩვენს თავს?“- განაცხადა ელისაშვილმა.