"კარასინმა მკითხა რატომ ატყდა ხმაური ივანიშვილთან შეხვედრის შემდეგ"- რა მესიჯებზე და დავალებებზე ისაუბრებს აბაშიძე-კარასინმა დახურულ შეხვედრაზე

პოლიტიკა - 12:22, 28 Feb, 2019

1205

რა გზავნილი ჩაუტანა ბიძინა ივანიშვილისგან პრემიერის სპეციალურმა წარმომადგენელმა, ზურაბ აბაშიძემ რუს კოლეგას - აბაშიძე აცხადებს, რომ ივანიშვილი პარტია „ქართული ოცნების“ თავმჯდომარეა და მას ინფორმაცია უნდა ჰქონდეს მნიშვნელოვან თემებზე, მათ შორის საქართველო-რუსეთის ურთიერთობაზე.

აბაშიძე ამბობს, რომ ივანიშვილს მისი ინიციატივით შეხვდა და მასთან კონკრეტული მესიჯები არ შეუთანხმებია.

მისი თქმით, კარასინთან მოლაპარაკებების მთავარი თემა სავაჭრო ეკონომიკური ურთიერთობები და ოკუპირებულ ტერიტორიებზე არსებული ვითარება იყო.

როგორც აბაშიძემ აღნიშნა, კარასინი შეხვედრაზე დაინტერესდა, თუ რატომ გაამახვილა ქართულმა მედიამ ივანიშვილთან მოლაპარაკების შესახებ ყურადღება.

„მკითხა მან, რატომ ატყდა ხმაური ქართულ მედიაში ივანიშვილთან შეხვედრის შემდეგ. ვუთხარი, რომ ეს არის ჩვენი შიდა პოლიტიკური კონიუნქტურის ნაწილი, ბატონი ივანიშვილი ჩვენი პარტიის თავმჯდომარე, მასთან შეხვედრა, მისი ინფორმირება პრაღაში მიმდინარე ჩვენი დიალოგის შესახებ ნორმალურ მოვლენად მიგვაჩნია...

ჩემთან ერთად არიან დელეგაციის წევრები, საგარეო საქმეთა სამინისტროს წარმოდგენელი, ეკონომიკის სამინისტროს წარმომადგენელი. ჩვენ მომვალ კვირას პარლამენტის საგარეო ურთიერთობათა კომიტეტში გვექნება მოსმენა და ალბათ, იქ იქნება საუბარი ყველაფერზე. დეტალურად ვისაუბრებთ ამ შეხვედრის შესახებ. არანაირი კონკრეტული მესიჯები თუ დავალებები შეხვედრასთან დაკავშირებით არ ყოფილა. მესიჯების შეთანხმება არ ყოფილა. ბატონი ბიძინა ჩემი ინიციატივით ჩავაყენე საქმის კურსში, მივაწოდე ინფორმაცია იმის თაობაზე, თუ როგორ მიმდინარეობს დიალოგი პრაღაში და სად ვართ იმ თემების განხილვისას, რაც ჩვენი მანდატისთვის არის გათვალისწინებული. ასეთ შეხვედრები ნორმალურია. ბატონი ბიძინა არის მმართველი, პარტიის თავმჯდომარე, ის უნდა იყოს საქმის კურსში ისეთ სერიოზულ თემებთან დაკავშირებით, როგორიც არის ქართულ-რუსული ურთიერთობები,“ - განაცხადა ზურაბ აბაშიძემ.