კარასინის-აბაშიძის მორიგი შეხვედრა პრაღაში - გრიგოლი კარასინმა სკანდალური განცხადება გააკეთა და განაცხადა , რომ ქართველი კოლეგები უსიამოვნო მოულოდნელობების შესახებ უნდა გააფრთხილოს, თუმცა არ დაუკონკრეტებია, თუ რა უსიამოვნო მოულოდნელობები ჰქონდა მხედველობაში.

საქართველოს ატლანტიკური საბჭოს ვიცე-პრეზიდენტის, ბათუ ქუთელიას შეფასებით, საქართველოს NATO-ში ინტეგრაციის პოლიტიკა საქართველოს მთავრობის მხრიდან კიდევ უფრო აგრესიული უნდა იყოს.

„რუსეთის გაღიზიანებას იწვევს საქართველოს მცდელობა, მაქსიმალურად დაუახლოვდეს ნატო-ს, თუ საქართველო ამ მიმართულებით ნაბიჯებს უკან გადადგამს, ან შეეცდება, ანგარიში გაუწიოს რუსეთის ფსევდო ინტერესებს, ეს იქნება სწორედ მოწვევა რუსული აგრესიის. ამიტომ, ვთვლი, რომ საქართველოს მთავრობის პასუხი უნდა იყოს - კიდევ უფრო აგრესიული ინტეგრაციის პოლიტიკა ნატოსთან, კიდევ უფრო გაზრდა ჩვენი თანამშრომლობის, მხოლოდ ამ შემთხვევაში შევძლებთ ჩვენ, შევაკავოთ რუსული აგრესია“, - განაცხადა ბათუ ქუთელია.