პრაღაში რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენლის, ზურაბ აბაშიძისა და რუსეთის საგარეო საქმეთა მინისტრის მოადგილის, გრიგორი კარასინის მორიგი შეხვედრა იმართება.

გრიგორი კარასინის თქმით, მიუხედავად ქვეყნებს შორის არსებული სირთულეებისა, ურთიერთობის განვითარება უნდა გაგრძელდეს. ამასთან, გრიგოლი კარასინმა სკანდალური განცხადება გააკეთა და განაცხადა , რომ ქართველი კოლეგები უსიამოვნო მოულოდნელობების შესახებ უნდა გააფრთხილოს, თუმცა არ დაუკონკრეტებია, თუ რა უსიამოვნო მოულოდნელობები ჰქონდა მხედველობაში.

„ევროპული საქართველოს“ წევრი, გიორგი კანდელაკი მიიჩნევს, რომ კარასინი მსგავს შეფასებას ჟენევის ფორმატის ფარგლებში ვერ გააკეთებდა:

„კარასინი ასეთ უპასუხისმგებლო განცხადებას ჟენევის ფორმატში, სადაც მოლაპარაკების მაგიდასთან სხედან შეერთებული შტატები და ევროკავშირი, ვერ გააკეთებდა. ეს ფორმატი რომ არსებობს, ასე განცალკევებულად ჟენევის ფორმატისგან, სადაც არანაირი შუამავლები არ არიან, თავისთავად, ამ ფორმატმა საქართველოს ზიანის გარდა არაფერი მოუტანა. „ქართული ოცნების“ მთავრობამ ჩვენს მეგობრებს შეუქმნა ილუზია ამ ფორმატით არსებობით, რომ თითქოს, მიმდინარეობს საქართველო-რუსეთის ურთიერთობის ნორმალიზაცია, როცა ასეთი ნორმალიზაცია არ მიმდინარეობს. კვლავაც ხდება საოკუპაციო ხაზის გადმოწევა, ჩვენი მოქალაქეების მოტაცება და მკვლელობაც,“- განაცხადა კანდელაკმა.