"საქართველოში ყველა პოლიტიკური პარტია შეთანხმდა იმაზე, რომ აუცილებელია ერთობლივი მოქმედებები" - ბურჯანაძე საარჩევნო სისტემის ცვლილების მოთხოვნას უერთდება

პოლიტიკა - 12:10, 27 Feb, 2019

942

„დემოკრატიული მოძრაობა ერთიანი საქართველოს“ ლიდერის ნინო ბურჯანაძის განცხადებით, ის რომ სრულიად ოპოზიცა გაერთიანდა ფორმატში „ყველა - მინუს ქართული ოცნება“, ეს თავად მმართველი გუნდის ქმედებების შედეგია, რადგან ხელისუფლებამ არ შეასრულა დანაპირები, რომელიც მან მოსახლეობას 2012 წელს მისცა და რომელიც პროპორციულ საარჩევნო სისტემაზე გადასვლას ითვალისწინებდა. ბურჯანაძის თქმით, იმ შემთხვევაში თუ „ქართული ოცნება“ მილიონი ადამიანის მოთხოვნას იგნორირებას გაუკეთებს, ცუდად დაამთავრებს:

„მე ძალიან მნიშვნელოვნად მიმაჩნია ის, რომ ყველა პოლიტიკური პარტია საქართველოში შეთანხმდა იმაზე, რომ აუცილებელია ერთობლივი მოქმედებები, იმისათვის რომ შეიცვალოს საარჩევნო გარემო და საქართველოს მოსახლეობას ერთხელ და სამუდამოდ მიეცეს შესაძლებლობა, რომ პარლამენტში დაინახოს ის პოლიტიკური ძალები, რომელთაც სინამდვილეში ენდობა. ფორმატი, რომელიც აქ არის „ყველა მინუს ქართული ოცნება“ და ეს არის ქართული ოცნების გადაწყვეტილება, იმიტომ რომ ოცნებას შეეძლო თავად გაეკეთებინა იმის ინიცირება, რასაც ხელისუფლებაში მოსვლამდე მხარს უჭერდა, ეს ფორმატი ნიშნავს იმას, რომ სრულიად პოლიტიკური სპექტრი, მიუხედავად განსხვავებებული პოლიტიკური შეხედულებებისა და განსხვავებული დამოკიდებულებისა ერთმანეთის მიმართ, ამბობს რომ ერთიანი ბრძოლა ნორმალური, თავისუფალი და დემოკრატიული საარჩევნო სისტემისთვის არის ძალიან მნშვნელოვანი. მე დარწმუნებული ვარ, რომ ჩვენ მოსახლეობა მხარს დაგვიჭერს იმაში, რომ თავად მოსახლეობის განწყობა აისახოს პარლამენტში. დარწმუნებული ვარ იმაში, რომ ხელმოწერები შეგროვდება. უგნურ ხელისუფლებაზე ზეწოლის ბერკეტი არის სწორედ ხალხის ნება და ხელისუფლება რომელიც მილიონი ადამიანის ნებას წინ აღუდგება ან იგნორირებას გაუკეთებს, როგორ დაამთავრებს ამას დიდი გამოცნობა არ სჭირდება. მე ვისურვებდი, რომ ხელისუფლებამ გონიერება გამოიჩინოს და შეასრულოს ის დანაპირები, რომელიც მოსახლეობას 2012 წლამდე წარმოუდგინა და ჩაატაროს თავისუფალი და დემოკრატიული არჩევნები.“- განაცხადა ნინო ბურჯანაძემ.