პროპორციულ საარჩევნო სისტემაზე გადასვლა - ოპოზიცია მზადაა მილიონი ადამიანის ხელმოწერა დააფიქსიროს

პოლიტიკა - 10:35, 27 Feb, 2019

821

20 ოპოზიციური პარტია საარჩევნო სისტემის შეცვლის მოთხოვნით დღეიდან ხელმოწერების შეგროვებას იწყებს. იმის მიუხედავად, რომ კანონის თანახმად კონკრეტული ინიციატივის წარსადგენად 200 ათასი ხელმოწერა საკმარისია, ოპოზიცია მზადაა მილიონი ადამიანის ხელმოწერა დააფიქსიროს. ხელისუფლების ოპონენტების განცხადებით, აღნიშნული ხელმოწერების შეგროვება საფუძველი უნდა გახდეს იმის, რომ „ოცნებამ“ საკუთარ გადაწყვეტილებას გადახედოს და 2020 წელს არჩევნები პროპორციული სისტემით ჩატარდეს:

"ეს იქნება სამართლიანი განაწილება, იმიტომ რომ მოქმედი შერეული სისტემა არ უზრუნველჰყოფს ქართველი ამომრჩევლის არჩევანის შესაბამის წარმომადგენლობას პარლამენტში."- განაცხადა თავისუფალი დემოკრატების წევრმა ალექსანდრე ბარამიძემ.

პროპორციულ საარჩევნო სისტემაზე გადასვლას სამართლიანი თამაშის წესად მიიჩნევს ენმ-ს წევრი გიორგი ბარამიძეც:

"უნდა იყოს სამართლიანი თამაშის წესები და ეს თამაშის წესებია რის პროპორციული სისტემა იმიტომ რომ პროპორციული სისტემა ყველაზე ადეკვატურად უზრუნველყოფს პარლამენტის ისეთი შემადგენლობის შექმნას, რომელიც მეტ-ნაკლებად ზუსტად ასახავს საზოგადოების მხარდაჭერას."- განაცხადა გია ბარამიძემ.

ოპოზიციურ სპექტრში არსებულ თანხმობაზე ამახვილებს ყურადღებას „ევროპული საქართველოს“ წევრი ირაკლი კიკნაველიძე:

"ეს არის ქართული დემოკრატიისთვის ის საკვანძო საკითხი, პროპორციულ არჩევნებზე გადასვლა, რაც მნიშვნელოვანია როგორ მთელი დემოკრატიული ოპოზიციისთვის, ისე ყველა სხვა აქტივისტური თუ არასამთავრობო ჯგუფისათვის საქართველოში."- განაცზადა ირაკლი კიკნაველიძემ.

„ახალი მემარჯვენეების“ წევრის მამუკა კაციტაძის თქმით, მაჟორიტარულ სისტემას ხელისუფლება მანდატების მოპარვისთვის იყენებს:

„2020 წლისთვის გაუქმდეს მაჟორიტარული არჩევნები, რომელიც ხელისუფლებას აძლევს დამატებითი მანდატების მითვისების, ანუ მოპარვის საშუალებას. ჩვენ გვინდა რომ პარლამენტს გავაგონოთ საკუთარი მილიონი მოქალაქის ხმა“- განაცხადა მამუკა კაციტაძემ.

„ევროპელი დემოკრატები“-ის ლიდერის პაატა დავითაიას თქმით, „ქართულ ოცნებას“ გაუჭირდება უარი თქვას მილიონი მოქალაქის მოთხოვნაზე:

„ჩვენ ვფიქრობთ, რომ უახლოესი თვეების განმავლობაში, როდესაც დამთავრებული იქნება ხელმოწერების შეგროვება, ჩვენ წარვსდგებით პარლამენტის, მოსახლეობის წინაშე და „ქართულ ოცნებას“ ძალიან გაუჭირდება ამ ინიციატივაზე უარის თქმა.“- განაცხადა პაატა დავითაიამ.