"უმრავლესობის ამოცანა იყო საზოგადოებას პასუხები არ მიეღო TBC-ს საქმეზე, ამდენი ინსტიტუტის ასე ორკესტრირებულად მოქმედება შესაძლებელია მხოლოდ ივანიშვილის პოლიტიკური ნებით“- ბაქრაძე

პოლიტიკა - 14:43, 26 Feb, 2019

888

„ევროპული საქართველოს“ ლიდერი დავით ბაქრაძე „თიბისი ბანკის“ წინააღმდეგ მიმდინარე ორკესტრირებულ შეტევაზე საუბრობს და ამ კონტექსტში ამბობს, რომ „ქვეყანაში არსებობს მხოლოდ ერთი ადამიანი, რომელსაც ეროვნული ბანკის, საპარლამენტო უმრავლესობის, პროკურატურის, ფინანსური მონიტორინგის სამსახურის და მთავრობის „ორკესტრირება“ შეუძლია“.

მისი შეფასებით, „კომიტეტის დღევანდელ სხდომაზე ძალიან მკაფიოდ გამოჩნდა ის, რომ ეროვნული ბანკის პრეზიდენტი არ აღმოჩნდა მზად, პასუხი გაეცა დეპუტატებისა და საზოგადოების კითხვებისთვის.

ასევე ბაქარაძის შეფასებით, სხდომის ჩაშლით უმრავლესობა დაფიქსირდა როგორც პოლიტიკური მხარე.

"ამ სხდომის ჩაშლით უმრავლესობამ, ნებით თუ უნებლიედ, აშკარა განზრახვით აიღო პასუხისმგებლობა „თიბისი ბანკის“ საქმეზე და ნათლად გამოაჩინა, რომ ეს არ არის დავა მარეგულირებელს და ბანკს შორის. „თიბისი ბანკის“ საქმე არის პოლიტიკური საქმე, რომელსაც გააჩნია მკაფიო პოლიტიკური განზომილება და უმრავლესობის მთელი ქცევა, მათ შორის ზეწოლა და კომიტეტის სხდომის ჩაშლა ცალსახად მიანიშნებს იმაზე, რომ დღეს უმრავლესობის ამოცანა სხდომის ჩაშლა იყო, რათა საზოგადოებას პასუხები არ მიეღო. ამით საპარლამენტო უმრავლესობამ დააფიქსირა საკუთარი თავი როგორც დაინტერესებულმა პოლიტიკურმა მხარემ. რაც შეეხება მამუკა ხაზარაძის განცხადებას ორკესტრირებული შეტევის შესახებ, ქვეყანაში არსებობს მხოლოდ ერთი ადამიანი, რომელსაც ეროვნული ბანკის, საპარლამენტო უმრავლესობის, პროკურატურის, ფინანსური მონიტორინგის სამსახურის და მთავრობის ორკესტრირება შეუძლია. ასეთი ადამიანი საქართველოში მხოლოდ ერთია. ბანკის დამფუძნებლებმა ეს არ განაცხადეს, მაგრამ მე ვერ ვხედავ სხვა ვარაუდის საფუძველს, გარდა იმისა, რომ ეს გახლავთ ბიძინა ივანიშვილი. მე არ მიყვარს კონსპირაციის თეორიები, მაგრამ საზოგადოება მართლაც ხედავს ორკესტრირებულ შეტევას და ამ ქვეყანაში ამდენი ინსტიტუტის ასე ორკესტრირებულად მოქმედება შესაძლებელია მხოლოდ ერთი კაცის პოლიტიკური ნების შემთხვევაში“, - განაცხადა ბაქრაძემ.