პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე, სადაც დეპუტატებს „თიბისი ბანკთან“ დაკავშირებულ პროცესზე ეროვნული ბანკის პრეზიდენტის მოსაზრებები უნდა მოესმინათ, მთავარი განსახილველი საკითხი პროცედურები გახდა. უმრავლესობის დეპუტატები მიიჩნევდნენ, რომ ასეთ მნიშვნელოვან საკითხზე განხილვები ან უნდა გადადებულიყო ან დახურულ რეჟიმში უნდა ყოფილიყო, ორაზროვანი იყო კობა გვენეტაძის პოზიციაც. საპარლამენტო უმცირესობის წევრის ირმა ნადირაშვილის განცხადებით, ეროვნული ბანკის პრეზიდენტს უნდა აეღო პასუხისმგებლობა და გადაეწყვიტა, გასცემდა თუ არა დეპუტატების შეკითხვებს პასუხს:

„ბატონო კობა მე მგონია, რომ თქვენ გაქვთ თავმოყვარეობა, ხომ ხედავთ რა ხდება, ნუ შეეცდებით, რომ უმრავლესობა გადაგეფაროთ, მე ვერ გავიგე თქვენი პასუხი, ხან ამბობთ, რომ აპირებთ პასუხი გაგვცეთ კითხვებზე, ხან თქვით, რომ რაღაცა საფრთხის შემცველია, თუ შეიძლება ერთხელ კიდევ და მარტივად აგვიხსენით, შეგიძლიათ თუ არა იმ კითხვებზე, რომელიც არ მიგაჩნიათ საფრთხის შემცველად გაგვცეთ პასუხი. თუ იზიარებთ, უმრავლესობის მოსაზრებას, რომ ახლა ამ კითხვებზე პასუხის დრო არ არის. თქვენ ალბათ არ აპირებთ, რომ თქვენი მომავალი დაისამაროთ ამ თანამდებობით, თქვენზეა პასუხისმგებლობა და გამოიყენეთ ეს შესაძლებლობა და აგვიხსენით რა წილი პასუხისმგებლობა გეკისრებათ“- მიმართა ირმა ნადირაშვილმა სებ-ის პრეზიდენტს.