პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე დეპუტატები საქართველოს ეროვნული ბანკის პრეზიდენტის კობა გვენეტაძის მოხსენებას ისმენენ. მთავარი თემები ეროვნული ბანკის მიერ შემოღებული ახალი რეგულაციები და „თიბისი ბანკთან“ დაკავშირებულ პროცესია, თუმცა კობა გვენეტეძემ გააკეთა განცხადება, რომ რეგულაციებზე საუბარი მიზანშეწონილი იქნებოდა მაშინ, როდესაც ერთი კვარტლის მონაცემები მაინც იქნებოდა, მან ასევე თიბისი ბანკის საქმეზე აღნიშნა, რომ რეგულატორის მიერ გამოტანილი გადაწყვეტილების განხილვა ასეთ ფორმატში არ უნდა ხდებოდეს.

გვენეტაძის განცხადებებს საპარლამენტო უმცირესობის წევრის ხათუნა გოგორიშვილის მხრიდან კრიტიკა მოჰყვა.

„რა ფორმატია, რომ კანონის მიხედვით მოწვეული პირი გვკარნახობს, რომ როგორ და რანაირად უნდა ვიმუშაოთ. რატომ ბედავს ამის გაკეთებას ეროვნული ბანკის პრეზიდენტი?“- მიმართა გოგორიშვილმა კომიტეტის თავმჯდომარეს.