„ქართულ ოცნებაში“ მიმდინარე მოვლენებს გაერთიანებული ოპოზიციის ერთ-ერთი ლიდერი, „ნაციონალური მოძრაობის“ პოლიტიკური საბჭოს თავმჯდომარე ნიკა მელია ეხმაურება.

მელია სოციალურ ქსელში წერს, რომ ბიძინა ივანიშვილს პარტია ეშლება, ხოლო ივანიშვილის უძლეველობა ცარიელი მითი რომ იყო, საპრეზიდენტო არჩევნებზე გამოჩნდა:

"ივანიშვილს პროცესებიც გაექცა და ხალხიც გაურბის. ვინც სულ ცოტა ხნის წინ პარტიას და მის ბელადს ადიდებდა, დღეს უკვე ღიად აგინებს პარტიას და მხოლოდ ბიძინას არ ესხმიან (საჯაროდ) თავს. ცხადია, ესეც ჯერჯერობით.

ივანიშვილს უმრავლესობაც და პარტიაც მარტივ მამრავლებად ეშლება და ეს პროცესი შეუქცევად სახეს იღებს. ივანიშვილის უძლეველობა რომ ცარიელი მითი იყო, ეს ჯერ კიდევ საპრეზიდენტო არჩევნებზე გამოჩნდა, როცა მისი ხელისუფლების დასასრული დაიწყო. დაწყებული დასასრული გრძელდება და ბოლოშიც მალე გავა.

რეალობა ესაა, რომელსაც ბევრი სხვაგვარად წარმოაჩენს - ზოგი შეგნებულად, ზოგიც უნებლიედ შეთქმულებების თეორიებშია და ამ პროცესებს ისე ასაღებს, თითქოს ბესელია კი არ წავიდა, ან ბიძინამ კი არ გააგდო, არამედ ეს ივანიშვილის საჭადრაკო სვლაა 2020 წლის არჩევნებზე გათვლილი.

მაინც რა უკონტროლო ფანტაზია უნდა გქონდეს რომ ბესელია იმ ფიგურად წარმოიდგინო, რომელიც რამე დასაყრდენს იპოვის ელექტორატში.

ბიძინა არც ისეთი გონიერი და ძლიერია რომ პარტიის ხელოვნური დაშლით პარტიის გაძლიერება შეეძლოს და არც ისეთი უტვინო და ბრიყვი, რომ ბესელიას დაეყრდნოს და დაიჯეროს რომ იგი მაგნიტად გამოდგება ელექტორატის მისაზიდად.

ეს ბიძინას თამაში კი არაა, ბიძინას პარტია ეშლება და მისთვის ეს ტრაგედიაა." - წერს ნიკა მელია