TBC ბანკის საქმე - ეროვნული ბანკის პრეზიდენტი კითხვებს გაექცა, გვენეტაძე პარლამენტში საკომიტეტო მოსმენას არ დაესწრება

პოლიტიკა - 10:02, 26 Feb, 2019

963

TBC ბანკის საქმე - ეროვნული ბანკის პრეზიდენტი კობა გვენეტაძე პარლამენტში საკომიტეტო მოსმენას არ დაესწრება.

ოპოზიცია დარწმუნებულია, რომ ეროვნული ბანკის პრეზიდენტი მწვავე კითხვებს გაექცა, რომელიც TBC-დან მამუკა ხაზარაძისა და ბადრი ჯაფარიძის გაშვებას უკავშირდება.

“თუ ეს განცხადება დარჩა ძალაში და ეროვნული ბანკის პრეზიდენტი არ მოდის პარლამენტში, ეს ნიშნავს, ერთს მხრივ პარლამენტის, როგორც ინსტიტუციის უპატივცემულობას და მეორეს მხრივ კანონის დარღვევას და კარგი იქნება თუ ბატონი გვენეტაძე ჯერ კანონში გაერკვევა და მერე გააკეთებს იმის შეფასებას, რატომ მიაჩნია მას არასწორად მოსვლა და რატომ არ უნდა მოვიდეს. ეს არ არის მისი დისკრეცია, მას აქვს ვალდებულება, რომ, როდესაც პარლამენტი დაიბარებს მოვიდეს,“-განაცხადა „ევროპული საქართველოს“ წევრმა სერგი კაპანაძემ.

იყო თუ არა პოლიტიკური ზეწოლა ბიძინა ივანიშვილის მხრიდან და რატომ დააყენა "ეროვნულმა ბანკმა" TBC-სთვის სანქციების დაწესებით დარტყმის წინაშე ქვეყნის საბანკო სისტემა- ეს არის კითხვები, რომელზეც პასუხის მიღება დეპუტატებს ეროვნული ბანკის პრეზიდენტისგან სურდათ.

„ეროვნული ბანკი და მისი პრეზიდენტი არის მთავრობის ტყვე. ფაქტობრივად, შედგება თუ არა კომიტეტის სხდომა, ეს დამოკიდებულია საქართველოს მთავრობაზე. ანუ ამ ქვეყნად არ არსებობს არც პარლამენტი, არც მისი რეგლამენტი, არც კომიტეტი. მიუხედავად იმისა, გამოცხადდება თ არა ეროვნული ბანკის პრეზიდენტი, ეს სხდომა არ უნდა ჩაიშალოს. ეს არის თიბისი ბანკთან და ანაკლიასთან დაკავშირებული საკითხების მიჩქმალვისა და სიმართლის არ თქმის მცდელობა,“-აცხადებს ენმ-ს წევრი რომან გოცირიძე.

საპარლამენტო უმრავლესობა კი აქცენტს ეროვნული ბანკის დამოუკიდებლობაზე აკეთებს. მმართველ გუნდში ასევე ამბობენ, რომ ეროვნულმა ბანკმა და TBC-ის ხელმძღვანელობამ პრობლემები მოაგვარა.