ქართული IDF - ჩიკაგო მესამე საერთაშორისო ბლოკჩეინ კონგრესს უმასპინძლებს

პოლიტიკა - 17:35, 24 Feb, 2019

675

2 აპრილს, ჩიკაგოში, საერთაშორისო ბლოკჩეინ კონგრესი გაიმართება. ღონისძიებიება წელს მესამედ ტარდება და მისი ორგანიზატორი "ინოვაციებისა და განვითარების ფონდის" (IDF) ამერიკის ბიუროა.

საერთაშორისო კონგრესში, მსოფლიოს სხვადასხვა ქვეყნიდან, 50 ზე მეტი სპიკერი მიიღებს მონაწილეობას. მათ შორის, ფონდის დამფუძნებელი, გიორგი ვაშაძე.

"უკვე მესამე წელია, საერთაშორისო კონგრესი ტრადიციად ვაქციეთ და სფეროს სპეციალისტებს ჩიკაგოში ვმასპინძლობთ. ინტერესი და ჩართულობა საკმაოდ დიდია. საერთაშორისო ექსპერტებთან ერთად, განვიხილავთ ისეთ საკითხებს, როგორიცაა კრიპტოვალუტა, გადახდის სამომავლო მეთოდები, ბიტკოინი, ბლოკჩეინ ეკონომიკა, მისი როლი მედიცინაში და სხვადასხვა სფეროს განვითარებაში. კიდევ ბევრ საინტერესო თემაზე გვექნება მსჯელობა. მოხარული ვიქნები, თუ მსგავსი სახის დისკუსიები საქართველოშიც გაიმართება. "– განაცხადა გიორგი ვაშაძემ.

2018 წელს, ბლოკჩეინ კონგრესი, ამერიკის შეერთებულ შტატებში 9 თებერვალს გაიმართა და მასში, ქართველ ექსპერტებთან ერთად, საერთაშორისო სპეციალისტებიც იყვნენ წარმოდგენილნი.

"ინოვაციებისა და განვითარების ფონდი" გიორგი ვაშაძის ხელმძღვანელობით 2014 წელს დაფუძნდა. ის მსოფლიოს რამდენიმე ქვეყანაში აქტიურად მიღვაწეობს და ამ დროისთვის, ფონდის ოფისები თბილისში, კიევსა და ჩიკაგოში ფუნქციონირებს. ჩრდილოეთ ამერიკის ოფისს, გივი ჩიქოვანი ხელმძღვანელობს. ფონდის მიერ უკრაინაში უკვე განხორციელდა არაერთი მნიშვნელოვანი რეფორმა, მათ შორის იუსტიციის სახლები – "გოტოვო". მისივე ინიციატივით შეიქმნა ანტიკორუფციული ბიურო და მომზადდა კანონპროექტი ანტიკორუფციული სასამართლოს შექმნის თაობაზე.