პარალმენტის თავმჯდომარე ამბობს, რომ გიორგი მშვენიერაძემ, გუშინდელი ბოიკოტით პოლიტიკური სპექტაკლი დადგა.

გუშინ არასამთავრობოების ნაწილმა მოსამართლეთა შერჩევის კრიტერიუმებზე მომუშავე ჯგუფის სხდომა პროტესტის ნიშნად დატოვა.

კობახიძის თქმით, გიორგი მშვენიერაძე სალომე ზურაბიშვილის წინააღმდეგ კამპანიაში იყო ჩართული.

„ეს არის ის გიორგი მშვენიერაძე, რომელიც იყო პირდაპირ ჩართული, მაგალითად, წინასაარჩევნო კამპანიაში სალომე ზურაბიშვილის წინააღმდეგ. ამ ადამიანის და შესაბამისად, ამ ძალების პოლიტიკური ინტერესი არის თვალსაჩინო, ისინი იბრძოდნენ პრეზიდენტის ინსტიტუტისთვის საპრეზიდენტო არჩევნების დროს, ისინი იბრძვიან კონკრეტული პოლიტიკური ინტერესებიდან გამომდინარე. მე შეგახსენებთ, რომ ვიდრე გააკეთებდა განცხადებას ბატონი გიორგი სხდომის დატოვების თაობაზე, მას უკვე დილას ჰქონდა გაკეთებული განცხადება იმის თაობაზე, რომ მოგვიანებით დატოვებდა სხდომას, არა პირდაპირი ფორმით, მაგრამ ის მოუწოდებდა ასევე სხვა მხარეებს, მათ შორის, საერთაშორისო პარტნიორებს, რომ არ მიეღოთ მონაწილეობა ამ სამუშაო პროცესში. ეს არის ბუნებრივი პოლიტიკური სპექტაკლი და როდესაც გეწოდება არასამთავრობო ორგანიზაცია, ბუნებრივია, არ უნდა მონაწილეობდე პოლიტიკურ სპექტაკლებში,“ - განაცხადა ირაკლი კობახიძემ.

ირაკლი კობახიძის თქმით, ამ ეტაპზე უზენაესი სასამართლოს მოსამართლეთა შერჩევის კრიტერიუმების ჩამოსაყალიბებლად მიმდინარეობს მსჯელობა.

„ჩვენი ამოცანა არის ის, რომ გავწეროთ მკაფიო პროცედურა და კრიტერიუმები და ეს იქნება უზრუნველყოფილი ჩვენ მიერ და საბოლოო ჯამში, ეს უზრუნველყოფს იმას, რომ მიღებული იქნება ისეთი გადაწყვეტილება, უზენაესი სასამართლოს მოსამართლეების არჩევასთან დაკავშირებით, როგორიც არის ქვეყნის ინტერესების და არა გიორგი მშვენიერაძის და ნაციონალური მოძრაობის ინტერესებში,“ - განაცხადა ირაკლი კობახიძემ.