ემბრიონს უნდა ჰქონდეს მუცლად მყოფი ბავშვის სტატუსი - საპატრიარქო საკანონმდებლო ცვლილებას ითხოვს

პოლიტიკა - 18:16, 22 Feb, 2019

1118

საპატრიარქო ითხოვს, რომ ემბრიონს მიენიჭოს მუცლად მყოფი ბავშვის სტატუსი. ამის შესახებ განცხადებები სამების საკათედრო ტაძრის ახალგაზრდულ ცენტრში აბორტის თემაზე მსჯელობისას გაკეთდა. შეხვედრას პარლამენტის დეპუტატებიც ესწრებოდნენ.

აბორტის თემაზე მომუშავე ჯგუფი, რომლის შემადგენლობის უმრავლესობასაც სასულიერო პირები შეადგენენ აღნიშნულ თემაზე საკანონმდებლო ცვლილებას ითხოვს. თუმცა დეპუტატების თქმით საკანონმდებლო ცვლილებები ამ საკითხზე არ იქნება.

საპატრიარქოს სამუშაო ჯგუფის წარმომადგენელის მამა გიორგი ფირცხელანის თქმით, ამ საკითხთან დაკავშირებით საზოგადოება ორმაგი სტანდარტით მოქმედებს.

„ეკლესია, ბავშვს ყოველთვის მიიჩნევდა პიროვნებად ჩასახვისთანავე. იმისთვის, რომ ქალს გაადვილებოდა აბორტის გაკეთება, ამ მანიპულაციას დაარქვეს პროცედურა, ხოლო აბორტის გამკეთებელს ექიმი. მოწყობილი იყო ყველაფერი იმისთვის რომ გაადვილებულიყო აბორტი. საზოგადოება, აბორტის შემთხვევაშიც კი, ქალს მაინც აღიქვამდა მზრუნველ დედად. ეს ორმაგი სტანდარტები დამახასიათებელია ბოროტებისთვის. ეს არის საშინელი ძალადობა, როცა ბავშვის არსებობის ყველაზე ბედნიერ, მუცლადყოფნის ხანაში, შეითქმებიან ზრდასრული ადამიანები მის წინააღმდეგ და უსწრაფებენ სიცოცხლეს“- განაცხადა მამა გიორგი ფირცხელანმა.

განათლების, მეცნიერებისა და კულტურის კომიტეტის თავმჯდომარის მარიამ ჯაშის თქმით აბორტების აკრძალვას წარუმატებელი საერთაშორისო გამოცდილება აქვს:

"ვფიქრობ მნიშვნელოვანია, რომ აბორტი ჩავანაცვლოთ უსაფრთხო, ჩასახვის საწინააღმდეგო პრეპარატების მოხმარებით. მკაცრი აკრძალვა არ არის გამოსავალი.“- განაცხადა მარიამ ჯაშმა.

ფოტო - რადიო თავისუფლება