"ხელისუფლების დავალებით, სასამართლომ ჩემი დაკავების ბრძანება გასცა"

"ხელისუფლების დავალებით, სასამართლომ ჩემი დაკავების ბრძანება გასცა" - ზვიად კუპრავა

პოლიტიკა - 17:54, 21 Feb, 2019

1017

"სამართალდამცავთა რეფორმირების ცენტრის" ხელმძღვანელი ზვიად კუპრავა ამბობს, რომ სდასამართლომ მას პატიმრობა შეუფარდა.

"სასამართლომ ხელისუფლების დაკვეთით ჩემი დაკავების ბრძანება გასცა. მე ვიმყოფები ჩემს სამუშაო ოთახში, არსად ვიმალები. ველოდები ჭავჭავაძის 29-ში"- აცხადებს კუპრავა.

მთავარ პროკურატურაში აცხადებენ, რომ თბილისის საქალაქო სასამართლომ კუპრავას აღკვეთის ღონისძიების სახით შეფარდებული გირაო პატიმრობით შეუცვალა.

„პროკურატურის შუამდგომლობის საფუძველზე სასამართლოს უპატივცემლობისთვის ბრალდებულს აღკვეთის ღონისძიება შეეცვალა. 2019 წლის 21 თებერვალს, თბილისის საქალაქო სასამართლოში ჩატარდა სხდომა ზ.კ-ს ბრალდების სისხლის სამართლის საქმეზე, რომელსაც ბრალად ედება საქართველოს სისხლის სამართლის კოდექსის 366-ე მუხლის მე-2 ნაწილით (სასამართლოს უპატივცემულობა, რაც გამოიხატა მოსამართლის შეურაცხყოფით) გათვალისწინებული დანაშაულის ჩადენა.

ბრალდების მხარემ მოითხოვა ზ.კ-ს მიმართ გირაოს სახით შეფარდებული აღკვეთის ღონისძიების შეცვლა უფრო მკაცრი აღკვეთის ღონისძიებით - პატიმრობით, ვინაიდან ბრალდებულმა ახალი დანაშაულის ჩადენით დაარღვია გირაოს პირობები.

პროკურორმა პროცესზე წარადგინა ზ.კ-ს მიმართ სხვა სისხლის სამართლის საქმეზე, 2019 წლის 19 თებერვალს გამოტანილი დადგენილება პირის ბრალდების შესახებ, საქართველოს სსკ-ის 126-ე მუხლის პირველი ნაწილით გათვალისწინებული დანაშაულის ჩადენისათვის"- აცხადებენ უწყებაში.