პოლიტიკურ დღის წესრიგს ჩვენ იუსტიციის უმაღლესი საბჭო გვკარნახობს

პოლიტიკურ დღის წესრიგს ჩვენ იუსტიციის უმაღლესი საბჭო გვკარნახობს - ეკა ბესელია

პოლიტიკა - 14:19, 21 Feb, 2019

644

„ქართული ოცნების“ წევრი, ეკა ბესელია სასამართლო სისტემას აკრიტიკებს.

მისი თქმით, „სასამართლო არ არის კორპორაცია, სასამართლო არ არის საკუთარი შპს, რომელსაც ისე უნდა უყურო, რომ მასში არავინ ჩაიხედოს".

„ეს ინიციატივა, რომელსაც სწორედ ის განაცხადი აქვს, გადაიდგას ნაბიჯები, აღარ არის დრო დეკლარაციების, განცხადებების, რომ მივმართოთ კომისიებს, საერთაშორისო პარტნიორებს, ყველამ ყველაფერი გვითხრა უკვე. გვითხრეს, რაზეც გვინდოდა, რომ პასუხი მიგვეღო. გვითხრეს, რომ არის რეფორმების დრო, გვითხრეს, რომ უნდა შეჩერდეს მოსამართლეთა უვადოდ გამწესება. ეს ითქვა დახურულ შეხვედრაზეც, მეოთხე ეტაპის რეფორმაზე ვმუშაობდით და ჩვენმა ერთ-ერთმა სტრატეგიული პარტნიორი ქვეყნის წარმომადგენელმა გააკეთა ეს განცხადება და მე მახსოვს, მაშინ პარლამენტის თავმჯდომარე დაეთანხმა ამ იდეას და მანაც თქვა, რომ უნდა შეჩერდეს მოსამართლეთა უვადოდ დანიშვნა. მაგრამ ეს არ შეისმინა საბჭომ, რომელსაც ეს ეხებოდა, იმიტომ, რომ მას აქვს თავისი ინტერესები, მას აქვს თავისი დღის წესრიგი და სასამართლო არ არის კორპორაცია, არ არის საკუთარი შპს, რომელსაც ისე უნდა უყურო, რომ მასში არავინ ჩაიხედოს ეს არის საქართველოს მართლმსაჯულება, რომელიც არის ყველასთვის...

პოლიტიკურ დღის წესრიგს ჩვენ საბჭო გვკარნახობს და მოსამართლეთა გარკვეული ჯგუფი, რაც მე მგონია, არის ძალიან სახიფათო, რაც საფრთხეს უქმნის სამართლიანობის იდეას და საფრთხეს უქმნის სასამართლო რეფორმას და საფრთხეს უქმნის მმართველ პარტიას, იმიტომ, რომ მისი ნდობის საკითხი დევს სასწორზე,“ - განაცხადა ბესელიამ.

ეკა ბესელიამ დეპუტატებთან საუბრისას ასევე განაცხადა, რომ სასამართლო რეფორმის მეოთხე ტალღა სწორედ იმიტომ დაიწყო, რომ სასამართლო სისტემაში პრობლემები ჯერ კიდევ არსებობდა. ბესელიას თქმით, ბოლო პერიოდში დარღვევები თვალსაჩინო გახდა, როდესაც მოსამართლეები უვადოდ მოსაცდელი ვადის დასრულებამდე განამწესეს.