ხაზარაძე პოლიტიკაში მოდის? - როგორ აფასებენ ექსპერტები „თიბისის“ დამფუძნებლის ბანკიდან წასვლას

პოლიტიკა - 11:28, 21 Feb, 2019

1454

პოლიტოლოგი გია ხუხაშვილი ამბობს, რომ საინტერესო და გასარკვევია, რამ მიაღებინა მამუკა ხაზარაძეს გადაწყვეტილება, რომ „თიბისი ბანკის“ სამეთვალყურეო საბჭო დაეტოვებინა.

რაც შეეხება შესაძლო მიზეზებს, ექსპერტი „ნიუპოსტთან“ აღნიშნავს, რომ სავარაუდოდ, მამუკა ხაზარაძემ პირადი და ბანკის ინტერესები გამიჯნა.

„მისი გადაწყვეტილება აბსოლუტურად გასაგებია. ბანკი ძალიან სენსიტიური სტრუქტურაა და ნებისმიერმა ასეთიმა ტიპის რყევებმა შეიძლება გამოუსწორებელი, შეუქცევადი რყევები გამოიწვიოს, ცამდე მართალიც რომ იყოს. შესაბამისად, არსებობს უფრო დიდი მიზეზი, ვიდრე პირადი ემოციებია. მან თავისი პირადი ქეისი და ბანკის ქეისი გამიჯნა, ბანკი დააზღვია რისკებისგან“ - განაცხადა ხუხაშვილმა.

გარდა ამისა, ექსპერტის შეფასებით, ამ ფონზე ხაზარაძის პოლიტიკურ პროცესებში ჩართვის ალბათობა გაიზარდა, თუმცა ბოლო წვეთი მაინც ანაკლიის პორტი და ის პროექტია, რომლის განვითარებისთვის ბრძოლა დააანონსა ხაზარაძემ.

„ვფიქრობ, რომ შანსები გაიზარდა, შანსი იმისა, რომ ხაზარაძე, საბოლოო ჯამში, პოლიტიკაში აღმოჩნდეს, გაიზარდა. რამდენად გაიზარდა ძნელი სათქმელია, იქიდან გამომდინარე, რომ ის აპირებს ანალიის პროექტისთვის ბრძოლას, მე სანამ ბოლო იმედი არ გადაიწურება, მანამდე მის პოლიტიკაში ინტეგრაციას არ ველოდები, მაგრამ თუ პორტშიც იგივე რისკები განვითარდა, გამოსარიცხი არაფერია“, - ამბობს ხუხაშვილი.