სასამართლო სისტემაში ცვლილებების აუცილებლობა და ეკა ბესელიას მიერ თანამოაზრეებთან ერთად შემუშავებული კანონპროეტი კვლავ განხილვის საგანია. მმართველმა გუნდმა კანონპროექტს უნდობლობა გამოუცხადა, ეკა ბესელია და მისი თანამოაზრეები კი გუნდის შესაძლო დატოვებაზე ალაპარაკდნენ, რაც კენჭისყრის შედეგად გადაწყდება.

არსებულ ვითარებას ფრაქცია „ქართული ოცნების“ თავმჯდომარე მამუკა მდინარაძე გამოეხმაურა. მისი თქმით, თუ ვინმეს გუნდიდან წასვლა სურს, მისი გადასაწყვეტია, კანონპროექტისთვის მხარის არდაჭერა კი ვინმეს გარიცხვას არ ნიშნავს:

„თუ ანტიკონსტიტუციურ კანონს ხმას არ აძლევს უმრავლესობა, ეს იმას ნიშნავს, რომ ვიღაცას ეუბნება წადი. ეს არასწორია. თუ მიაჩნია რომელიმე დეპუტატს, რომ მის მიერ შექმნილ ანტიკონსტიტუციურ კანონს თუ ვინმე მხარს არ დაუჭერს, უნდა წავიდეს, ეს მისი გადასაწყვეტია, უბრალოდ, უხერხულ მდგომარეობაში აღმოჩნდება თუ ვინმე ასეთ განცხადებას გააკეთებს,“ - განაცხადა მამუკა მდინარაძემ.

მდინარაძის განცხადებით, ის არ ფლობს ინფორმაციას ეკა ბესელიასა და პარტიის თავმჯდომარის, ბიძინა ივანიშვილის შეხვედრის შესახებ:

„ჯერჯერობით, მსგავსი შეხვედრის შესახებ ჩემთვის არავის უცნობებია. დილით ვიყავი პოლიტსაბჭოს სხდომაზე, ასეთ შეხვედრაზე არავის უთქვამს ჩემთვის, რომ ასეთი შეხვედრა შედგა,“ - განაცხადა მამუკა მდინარაძემ.