პარლამენტის ფრაქცია „ქართული ოცნების“ თავმჯდომარე მამუკა მდინარაძე „თიბისი ბანკთან“ დაკავშირებით გამოძიებას სიფრთხილისკენ მოუწოდებს.

მისი თქმით, აღნიშნულ საქმესთან მიმართებით, ხელისუფლების უპირველესი ინტერესი გამჭვირვალობაა. იგი ოპოზიციის წევრების განცხადებას ამ საკითხთან მიმართებით, პოლიტიკურ სპეკულაციას უწოდებს:

„განსაკუთრებული სიფრთხილე მართებს გამოძიებასაც თითოეულ დეტალთან მიმართებაში. ხელისუფლებასაც, თუნდაც გაკეთებულ განცხადებებში, იმიტომ რომ ერთი მხრივ, საქმე შეეხება უდიდეს ფინანსურ ინსტიტუტი, მეორე მხრივ, საქმე შეეხება კონკრეტულ გამოძიებას, რომლის პოლიტიზირება შეიძლება ძალიან დამაზიანებელი იყოს და გამოძიების ინტერესებსაც კი შეეწინააღმდეგოს. აქედან გამომდინარე, გამჭვირვალობა არის პირველ რიგში ხელისუფლების ინტერესი, დანარჩენი ოპოზიციისთვის ნებისმიერი საქმე, რომელიც რეზონანსული ხდება, სპეკულაციის საგანია, საშუალებაა, რომ ხელისუფლებას ზიანი მიაყენოს. ეს გასაგებია, მაგრამ როდესაც გამოდის თვითონ ობიექტი, ვისზეც ვსაუბრობთ და ამბობს, რომ ჩვენ ვთანამშრომლობთ პროკურატურასთან, ჩვენ ვთანამშრომლობთ პარლამენტთან, ეს არის ძალიან კარგი,“ - განაცხადა მამუკა მდინარაძემ.