"იყოს აზერბაიჯანი და ცოტა გაზი მივიღოთ რუსეთიდანაც... გაზპრომს არ აქვს არანაირი დიდი ინტერესი ამაში "- ეკონომიკის მინისტრი

პოლიტიკა - 14:46, 18 Feb, 2019

1504

ეკონომიკის მინისტრის, გიორგი ქობულიას თქმით, ქვეყანაში გაზთან დაკავშირებით ვითარება მონოპოლიური არ უნდა იყოს და გაზი მხოლოდ აზერბაიჯანის გავლით არ უნდა შემოდიოდეს. მინისტრის თქმით, რუსეთიდან მეტი გაზის მიღება ქვეყანაში კონკურენციას შექმნის და გაზის ფასებს დაწევს:

"ჩვენ ვახორციელებთ ტრანზიტს გაზის სომხეთში საქართველოს ტერიტორიის გავლით.

პირველი, რასაც ჩვენ ვიღებთ ამის ხარჯზე, არის ის, რომ ჩვენ რუსეთი, გაზპრომი გვიხდის ფულს კონკრეტულად ამ ტრანზიტისთვის. რისი გაუმჯობესებაც გინდა, ის არის, რომ მეტი გადასახადი მივიღოთ ამ ტრანზიტში.

მეორე პირობა, ჩვენ ვიცით, რომ გაზის ის მოცულობები, რაც გადის მილში, მათ ნაწილს ვიყენებთ, იმიტომ რომ ჩვენ გაზი შემოგვაქვს აზერბაიჯანიდან და მეორე გზა, რომ გაზი შემოვიდეს, არის რუსეთი. ამიტომ, თუ რამე პრობლემებია აზერბაიჯანიდან გაზის შემოტანაზე, ჩვენ ყოველთვის ვიყენებდით რუსეთის გაზს.

ჩვენ ენერგოუსაფრთხოების და ენერგოდამოუკიდებლობის ფარგლებში, ზოგჯერ ცოტა მეტი გაზი რომ მივიღოთ რუსეთიდან, შეიძლება შევქმნათ დივერსიფიკაცია საქართველოს ბაზარზე, არ იყოს მონოპოლური მდგომარეობა და ერთადერთი მომწოდებელი აზერბაიჯანი, არამედ იყოს აზერბაიჯანი და ცოტა გაზი მივიღოთ რუსეთიდანაც. ამისგან ჩვენი მოსახლეობა და ჩვენი კომპანიები, ბიზნესი მიიღებენ ძალიან დიდ სარგებელს, იმიტომ რომ გაჩნდება მინიმალური კონკურენცია და რა თქმა უნდა, ეს იმოქმედებს ფასებზე", - თქვა გიორგი ქობულიამ იმედი LIVE-ის ეთერში.

ქობულიას განცხადებით, გაზპრომისთვის საქართველო კომერციულად მომგებიანი არ არის და გაზპრომი საქართველოს უფრო ჭირდება, ვიდრე გაზპრომს საქართველო

"ამიტომ გაზპრომს არ აქვს არანაირი დიდი ინტერესი ამაში... მე დიდ რისკებს ვერ ვხედავ იმაში, რომ ჩვენ რაღაც განსაზღვრული რაოდენობა შემოვიტანოთ იმიტომ, რომ ეს უნდა მოხდეს ენერგოუსაფრთხოებისა და დამოუკიდებლობის ფარგლებში", — განმარტა ქობულიამ.

საქართველოს ეკონომიკის მინისტრის თქმით, საქართველოს მთავრობა გაზპრომთან კონტრაქტის გაუმჯობესებაზე მუშაობს.