დეკანოზ გიორგი მამალაძის ძმა, თორნიკე მამალაძე ამბობს, რომ მისი ძმის ჯანმრთელობის მდგომარეობა დღითიდღე მძიმდება, ღუდუშაურის კლინიკის ექიმები კი საზოგადოებას პაციენტის ზუსტ დიაგნოზს არ აწვდიან.

მამალაძეები საპატრიარქოსთან დადგმულ კარავში რჩებიან და იმედს გამოთქვამენ, რომ საქართველოს კათოლიკოს-პატრიარქი დეკანოზის შეწყალების მოთხოვნით პრეზიდენტს მიმართავს.

"პირად საუბრებში მეუბნებიან, რომ ინსულტი აქვს, თუმცა ამის გავრცელებისგან თავს იკავებენ. ჩემი ძმის მდგომარეობა დამძიმდა. პარალიზებულია, მეტყველება უჭირს"- აცხადებს "ნიუპოსტთან" მამალაძე.

მისი თქმით, ექიმებზე ზეწოლას კლინიკის მფლობელი ელგუჯა გოცირიძე ახდენს, რომელიც "ქართული ოცნების" დეპუტატია.

"ჩემი აზრით, ის ზეწოლას ახდენს ექიმებზე, რომ საზოგადოებამ სრული დიაგნოზი არ გაიგოს. მინდა, ჩემი ძმა ცოცხალი დაუბრუნდეს ოჯახს საქართველოს კათოლიკოს-პატრიარქისგან ვითხოვთ, რომ ჩემი ძმის შეწყალებით პრეზიდენტს მიმართოს"- განაცხადა "ნიუპოსტთან" თორნიკე მამალაძემ.