დეკანოზ გიორგი მამალაძის ჯანმრთელობის მდგომარეობა - ე.წ. ციანიდის საქმეზე მსჯავრდებული სასულიერო პირი გვიან ღამით ღუდუშაურის საავადმყოფოში გადაიყვანეს. წინასწარი ინფორმაციით, მას ინსულტის ნიშნები აღენიშნება.

საკითხზე ჟურნალისტის კითხვის საპასუხოდ გორისა და ატენის მიტროპოლიტმა ანდრია გვაზავამ განაცხადა, რომ იგი დეკანოზს მალე გამოჯანმრთელებას უსურვებს:

„მე შემიძლია ერთი რამ ვთქვა, რომ ვწუხვარ მამა გიორგის ჯანმრთელობის გამო, ვუსურვებ მას მალე გამოჯანმრთელებას, მე ვლოცულობდი და ვაგრძელებ ლოცვას მისთვის და მისი ოჯახისათვის“, - განაცხადა მეუფე ანდრია გვაზავამ.

შეგახსენებთ, რომ არსებული ინფორმაციით დეკანოზმა გიორგი მამალაძემ ციხიდან საკმაოდ სკანდალური წერილი გამოგზავნა, სადაც საპატრიარქოს ბიზნესებზეა საუბარი, წერილის ერთ-ერთი ადრესატი კი სწორედ მეუფე ანდრია გვაზავაა. თუმცა მეუფეს აღნიშნულ საკითხზე დღეს კომენტარი არ გაუკეთებია.