"ხაზარაძეს ერთადერთი გამოსავალი აქვს, დაიწყოს ღია ბრძოლა ივანიშვილის წინააღმდეგ"

"ხაზარაძეს ერთადერთი გამოსავალი აქვს, დაიწყოს ღია ბრძოლა ივანიშვილის წინააღმდეგ" - ნიკა მელია

პოლიტიკა - 17:06, 15 Feb, 2019

1104

თიბისი ბანკის და მისი სამეთვალყურეო საბჭოს თავმჯდომარის მამუკა ხაზარაძის ირგვლივ განვითარებულ მოვლენებს „ნაციონალური მოძრაობის“ პოლიტსაბჭოს თავმჯდომარე ეხმაურება. ნიკა მელიას თქმით, ივანიშვილის სამიზნე ამჯერად მამუკა ხაზარაძეა, „ივანიშვილი TBC ბანკს ხაზარაძის დისკრედიტაციით გუდავს და ხაზარაძეს ბანკის მეშვეობით“- ამბობს ნიკა მელია. მისი თქმით, მამუკა ხაზარაძეს თავის გადარჩენის ერთადერთი გზა დარჩა, ის ივანიშვილის წინააღმდეგ ღია ბრძოლაში უნდა ჩაებას.

„ივანიშვილს, როგორც „მგუდავს“ ამჯერად მამუკა ხაზარაძე და TBC ბანკი ჰყავს მიზანში ამოღებული გასაგუდად. ბანკს ხაზარაძის დისკრედიტაციით ანადგურებს და თვითონ ხაზარაძეს ბანკის მეშვეობით!

ფაქტია, ვიდრე მამუკა ხაზარაძე TBC ბანკის სამეთვალყურეო საბჭოს თავჯდომარეა, ხელ-ფეხი აქვს შეკრული და რომც უნდოდეს, ვერანაირ პოლიტიკურ განცხადებას ვერ გააკეთებს და პოლიტიკურ ბრძოლაში ვერ ჩაებმება. ეს რომ გააკეთოს ლონდონის საფონდო ბირჟაზე კატასტროფულად დავარდება აქციების ფასი და ზარალი აუნაზღაურებელი იქნება. ისედაც, TBC ბანკმა ერთ დღეში 176 მილიონი ლარი დაკარგა და აქციების ფასი 6,66%-ით გაუფასურდა.

მოკლედ, ხაზარაძემ რომ პოლიტიკური განცხადებებების კეთება დაიწყოს, გუშინდელი დღე მონაგონი იქნება. ივანიშვილმა ეს გადასარევად იცის და ხაზარაძე კუთხეში ჰყავს მიმწყვდეული.

დიახ, ივანიშვილი TBC ბანკს ხაზარაძის დისკრედიტაციით გუდავს და ხაზარაძეს ბანკის მეშვეობით! ხაზარაძეს ერთადერთი გამოსავალი აქვს, თავისი ნებით გადადგეს ბანკში დაკავებული ყველა ოფიციალური პოზიციიდან, გადგეს გვერდით და დაიწყოს ღია ბრძოლა ივანიშვილის წინააღმდეგ. მხოლოდ ამ გზით გადაირჩენს თავს!“- წერს ნიკა მელია.