სებ-ის გუშინედლი მოთხოვნის გამო, ლონდონის საფონდო ბირჟაზე ბანკის აქციების ფასი თითქმის 7%-ით დაეცა, რაც ბანკისთვის მილიონობით ლარის ოდენობის ზარალს ნიშნავს.

რა ბედი ელის საქართველოში ლიდერ ბანკს და მის მომხმარებლებს? აღნიშნულზე სასაუბროდ „ნიუპოსტი“ „საზოგადოება და ბანკების“ გამგეობის თავმჯდომარეს გიორგი კეპულაძეს დაუკავშირდა. მისი განცხადებით არსებული ვითარება დამაზიანებელია „თიბისი ბანკისთვის“, თუმცა მას გამართული საფინანსო და ეკონომიკური სისტემა აქვს, შესაბამისად, მომხმარებლებს რაიმე ზიანი არ შეიძლება მიადგეს:

„პროცესი არის დამაზიანებელი თავად „თიბისი ბანკისთვის“, ის არის სტაბილური, ფინანსურად და ეკონომიკურად გამართული ბანკი, თუმცა ეს პროცესი რა თქმა უნდა, შეიცავს ძალიან დიდ რეპუტაციულ რისკს. ბანკი არის ნდობაზე დაფუძნებული ბიზნესი, შესაბამისად ეს პროცესი არ წაადგება დადებითად „თიბისი ბანკის“ საქმიანობას.

რაც შეეხება მომხმარებლების უფლებებისა და ფინანსების დაცვას, ამ მხრივ ვერ ვხედავ ვერანაირ პრობლემას. ეს ბანკი არის გამართული კაპიტალით იქნება ეს თუ აქტივებით, შესაბამისად არ მგონია, რომ მეანაბრეებს ან მსესხებლებს რაიმე პრობლემები შეექმნათ“, - განაცხადა კეპულაძემ.

მისივე თქმით, „თიბისი ბანკი“ შეძლებს არსებულ პრობლემებს წარმატებით გაართვას თავი:

„ბანკი არ არის მხოლოდ მომხარებელი, აქ არიან მისი ინვესტორები, აქციონერები, რომლებიც აკვირდებიან პროცესს, ის, რომ გუშინ დაეცა „თიბისი ბანკის“ აქციების ფასი დაახლოებით 7%-ით, ეს უკვე საკმაოდ სერიოზული ფინანსური ზარალია, თუმცა, ვიმედოვნებ, რომ ბანკი ამ კრიზისულ სიტუაციას წარმატებით გაართმევს თავს და მას კვლავ ექნება ლიდერი ბანკის პოზიცია. ახლაც აქვს, მაგრამ რეპუტაციულად და მორალურად ძალიან მძიმეა მამუმაკა ხაზარაძისთვის, როდესაც არ არის ჩვეულებრივი ბიზნესი, მისთვის ეს ძალიან მნიშვნელოვანი ცხოვრებისეული თემაა, შესაბამისად ამ ბანკში არის ჩადებული ბევრი უცხოელი ინვესტორის ინტერესი. მე იმედს ვიტოვებ, რომ „თიბისი ბანკი“ წარმატებით გადალახავს ამ კრიზისს“, - აღნიშნა გიორგი კეპულაძემ.