" გარეთ იყო ჯალათი, ლადო ბედუკაძე, რომელმაც ციხეში სიკვდილამდე მიიყვანა"- რას ჰყვება ბედუკაძის ცემაში ბრალდებულის დედა

პოლიტიკა - 21:45, 14 Feb, 2019

3427

ყოფილი პატიმრის თენგიზ ნაზღაიძის დედა, შორენა ქალდანი ყვება, რატომ დაესხა თავს მისი შვილი ქაშუეთის ეკლესიის ეზოში გლდანის ციხის რეჟიმის ყოფილ უფროსს. შორენა ქალდანი კურიერთან ინტერვიუში ამბობს, რომ დაპირისპირების ინიციატორი თავად ლადო ბედუკაძე იყო.

დედის ინფორმაციით, გლდანის ციხეში სასჯელის მოხდის პერიოდში მის შვილს ლადო ბედუკაძე აწამებდა. ოჯახის მტკიცებით, მკვლელობის მცდელობისთვის დაკავებული ნაზღაიძე ბრალს არ აღიარებდა, ბედუკაძის მხრიდან კი არაადამიანური მოპყრობის მიზეზი აღიარებითი ჩვენების მიღება იყო.

თენგიზ ნაზღაიძემ გლდანის ციხე 2015 წელს დატოვა. მას შემდეგ ოჯახი წამებისა და არაადამიანური მოპყრობისთვის ლადო ბედუკაძის დასჯას ითხოვს, მათ საჩივარი მთავარ პროკურატურაშიც შეიტანეს, თუმცა რეაგირება ამ დრომდე არ მომხდარა. წამების ფაქტებზე წერილი ოჯახმა ეკა ბესელიასაც გაუგზავნა.

„დღეს წავიდა ეკლესიაში, ეკლესიიდან რომ გამოვიდა, გარეთ იყო ჯალათი, ლადო ბედუკაძე, რომელმაც ციხეში სიკვდილამდე მიიყვანა. ერთმანეთს რომ შეეფეთნენ, იმან იქედნურად ჩაიცინა, იმან რომ ჩაიცინა ჩემი ბიჭი გაგიჟდა, მიცანიო? რატომ მაწამებდი და მკლავდი, რა დაგიშავეო? ის აქეთ გადავიდა გონორზე.“- განაცხადა შორენა ქალდანმა, მან ციხეში მისი შვილის ცემაც გაიხსენა და განაცხადა, რომ ბედუკაძემ მის შვილს, რომელსაც გიფსი ეკეთა 20 კაცი დაასია და აცემინა. შორენა ქალდანის თქმით, ბედუკაძე დასაჭერი და დასასჯელია.