"პრეზიდენტის მთავრობის კომპეტენციაში ჩარევა პრინციპების დარღვევას გამოიწვევს" - სესიაშვილი ეროვნული უსაფრთხოების საბჭოში სალომე ზურაბიშვილის ადგილს ვერ ხედავს

პოლიტიკა - 17:46, 14 Feb, 2019

702

დეპუტატი ირაკლი სესიაშვილი ამბობს, რომ თუკი პრემიერის სათათბირო ორგანოში წარმოვიდგენთ პრეზიდენტის მონაწილეობას, ამით შეიძლება დაირღვეს სახელისუფლებო შტოებს შორის ძალაუფლების განაწილების პრინციპი.

"თუ პრემიერის სათათბირო ორგანოში წარმოვიდგენთ პრეზიდენტის, პარლამენტის მონაწილეობას, შეიძლება დავარღვიოთ სახელისუფლებო შტოებს შორის ძალაუფლების განაწილების პრინციპი.

ეროვნული უშიშროების საბჭო არის პრემიერის სათათბირო ორგანო, ეს არის მთავრობის კომპეტენცია და ამ საბჭოს ფარგლებში არანაირი გადაწყვეტილება არ მიიღება. მთავრობას აქვს თავისი კომპეტენცია, მთავრობის კომპეტენციაში ჩარევა გამოიწვევს ძირითადი პრინციპების დარღვევას. თუმცა მთავარი რაც არის, პრეზიდენტი იყოს ინფორმირებული თავდაცვის საკითხებთან დაკავშირებით, ეს ასე არის, თუ საჭიროა დამატებითი კომუნიკაციის შესაძლებლობების გაზრდა, აქაც რა თქმა უნდა ყველა მივესალმებით. მე პირადად ვერ ვხედავ რაიმე ისეთ გამოწვევას შინაარსობრივად, რომ ამით ეროვნული ინტერესები დაზიანდეს. დარწმუნებული ვარ, რომ ჩვენ შევძლებთ შეჯერებას.

იქ სადაც მთავრობაა, არის მთავრობის კომპეტენციები, იქ სადაც პრეზიდენტია, არის პრეზიდენტის კომპეტენცია. პრეზიდენტი, როგორც უმაღლესი მთავარსარდალი, რა თქმა უნდა, არის და იქნება ინფორმირებული საფრთხეებთან და თავდაცვის საკითხებთან მიმართებაში, რისთვისაც მას აქვს პირდაპირი კომუნიკაცია პრემიერ-მინისტრთან, თავდაცვის მინისტრთან. მაგრამ ჩემი პირდაპირი პოზიცია არის, რომ თუკი პრემიერის სათათბირო ორგანოში წარმოვიდგენთ პრეზიდენტის, პარლამენტის მონაწილეობას, ამით შეიძლება დავარღვიოთ ჩვენი სახელისუფლებო შტოებს შორის ძალაუფლების განაწილების პრინციპი“, - განაცხადა სესიაშვილმა.