ოპოზიცია არჩევნების პროპორციული სისტემის ჩატარების მოთხოვნის გარშემო ერთიანდება. ოპოზიციის წარმომადგენლები დღეს შეხვედრას მართავენ, რომელზეც სამომავლო სტრატეგაზე და საბოლოო პოზიციის ჩამოყალიბებაზე მსჯელობენ. შეხვედრას 21 პარტია ესწრება.

„ახალი მემარჯვენეების“ ლიდერის მამუკა კაციტაძის თქმით, იმის მიუხედავად, რომ კამპანიისთვის 200 ათასი ხელმოწერაა საჭირო, ოპოზიცია შეძლებს, რომ მილიონამდე ხელმოწერა შეაგროვოს და ხელისუფლებას აჩვენოს, თუ რამდენად აუცილებელია ამ ცვლილების განხორციელება და როგორი ერთიანია ამაში საზოგადოება და ოპოზიციიური სპექტრი:

„კამპანიას ასე ჰქვია, მილიონი ხმა საარჩევნო სისტემის შესაცვლელად, ჩვენ გვეძლევა მაქსიმუმ 4 თვე იმისთვის, რომ შეგროვდეს ძალიან ბევრი ხმა, სასურველია მილიონი ხმა, ისე ჭირდება 200 ათასი და ჩავაბაროთ ეს ყველაფერი პარლამენტს, რათა დაიწყოს საერთო საჯარო განხილვის ერთთვიანი პროცესი, შემდეგ საკომიტეტო-საპარლამენტო მოსმენები. ჩვენი მიზანია, რომ მორიგი წარმატებული მცდელობა განვახორციელოთ უვარგისი საარჩევნო სისტემის გასაუმჯობესებლად, რათა 2020 წელს არჩევნები ჩატარდეს პროპორციული წესით. მარტივად დგას საკითხი, თუ რაღაც კარგია 2024 წელს, რატომ არ შეიძლება ეს კარგი განხორციელდეს 2020 წელს . რატომ უნდა მოიპაროს ხელისუფლებამ კიდევ ერთხელ დაახლოებით 25% მანდატებისა, როცა ეს შეიძლება გამოვასწოროთ.“- განაცხადა მამუკა კაციტაძემ.