თბილისის მერია კომერციული ბანკებიდან 62 მილიონი ლარის სესხს აიღებს

პოლიტიკა - 17:06, 12 Feb, 2019

848

თბილისის მერია კომერციული ბანკებიდან 62 მილიონი ლარის სესხის აღებას გეგმავს.

როგორც საკრებულოს უმრავლესობაში განმარტავენ, ეს თანხა დაწყებული ინფრასტრუქტურული პროექტების განხორციელებას უნდა მოხმარდეს.

პროექტს საკრებულოს უმრავლესობა იწონებს.

„დაახლოებით, 100 მილიონ ლარზე მეტი ტრანსფერი იგეგმება დედაქალაქის ბიუჯეტში რომ განხორციელდეს. თუმცა, ის შეიძლება, ცოტა მოგვიანებით, მეორე კვარტლის ბოლოს იყოს განხორციელებული. გამომდინარე იქიდან, რომ დრო არ დავკარგოთ იმიტომ, რომ პროექტების რეალიზაციას სჭირდება ტენდერების გამოცხადება, წინასაპროექტო გამოცხადება, ამის დაზუსტება და ა.შ. და აქედან გამომდინარე, დედაქალაქის მერიამ გამიჩინა ინიციატივა, რომ გარკვეული საკრედიტო ხაზი შეიქმნას, 62 მილიონ ლარზე მეტი ოდენობის, რომელიც იქნება უკვე ფინანსური საფუძველი, რომ კაპიტალური ინვესტიცია განხორციელდეს დედაქალაქში,“ - განაცხადა თბილისის საკრებულოს ქონების მართვისა და საფინანსო-საბიუჯეტო კომისიის თავმჯდომარემ, ირაკლი ზარქუამ.

ინიციატივას არ იზიარებს ნაციონალური მოძრაობა, რადგან მათი შეფასებით ამის აუცილებლობა არ არსებობს.

„ჩვენ ვფიქრობთ, რომ ამის საჭიროება ახლა არ იყო. მაგალითად, მხოლოდ ბიუროკრატია რომ შეემცირებინათ, 40 მილიონი ლარის მობილიზებას მხოლოდ აქედან შეძლებდნენ და ასევე იმ ტენდერებიდან და იმ კორუფციული გარიგებების ნაცვლად, რომ ყოფილიყო სამართლიანი გამჭირვალე მმართველობა დამატებით კიდევ რამდენიმე ათეული მილიონი ლარი დარჩებოდა თბილისის მერიას. ეს ყველაფერი კეთდება იმიტომ, რომ ისინი არასწორად მართავენ ქვეყანას, არასწორად მართავენ ქალაქს და იზრდება დღიდან დღემდე, როგორც ცენტრალური ვალი ქვეყნის, ასევე თბილისის მერიის ვალი,“ - განაცხადა ირაკლი ნადირაძემ.