ხორავას ქუჩაზე მომხდარი მოზარდების მკვლელობის საქმის პროკურორი თორნიკე ნადირაძე, დავით სარალიძის მამას ზაზა სარალიძის სასამართლო პროცესის დატოვებას ეხმაურება და აღნიშნავს, რომ მოწმე მიხეილ კალანდიას ჩვენება არის სანდო.

„მნიშვნელოვანია ის გარემოება, რომ სასამართლოს მიერ რელევანტურად იქნა ჩათვლილი ის მტკიცებულებები, რომელიც ბრალდების მხარემ წარმოადგინა სააპელაციო სასამართლოში. საუბარი მაქვს მოწმის გამოძიებაში გამოკითხვის ოქმზე, სადაც ის საუბრობს მის მიმართ განხორციელებულ ზემოქმედების ფაქტთან დაკავშირებით. და ყველაზე მნიშვნელოვანი გარემოება, სასამართლოს მიერ მიღებული შემაჯამებელი გადაწყვეტილება, რომელმაც უდაო ფაქტად მიიჩნია , რომ ასეთი ტიპის ზემოქმედებას მოწმეზე ნამდვილად ჰქონდა ადგილი. ბრალდების მხარეს აქვს მოლოდინი იმისა, რომ არსებული ზემოქმედების ფაქტის დადასტურებით ცალსახად იქნება მიჩნეული ის, რომ მოწმე მ.კ. არის სანდო მოწმე და შესაბამისად მისი ჩვენება უნდა იქნას გათვალისწინებული სასამართლოს მიერ" - აღნიშნა პროკურორმა.

სასამართლო პროცესზე ჩვენებას მოწმე მიხეილ კალანდია ამ წუთებში აძლევს. ზაზა სარალიძე აცხადებს, რომ პროცესზე ბრალდების მხარის მინიშნებები იმის დამადასტურებელია, რომ პროკურატურა კალანდიას უდანაშაულობის დამტკიცებას ცდილობს.