უკან გადადგმული ნაბიჯი - იუსტიციის უმაღლესი საბჭოს მოსამართლე წევრებისთვის მოსამართლეების უვადოდ გამწესების 5 წლით შეჩერება მიუღებელია

პოლიტიკა - 11:40, 11 Feb, 2019

492

საქალაქო სასამართლოში იუსტიციის უმაღლესი საბჭო საქალაქო და სააპელაციო სასამართლოებში მოსამართლეთა უვადოდ დანიშვნის პროცესის შეჩერების საკითხზე პროცესი მიმდინარეობს.

პარლამენტის ბიუროს 11 თებერვლის სხდომაზე „საერთო სასამართლოების შესახებ“ ორგანულ კანონში ცვლილებები წარედგინება, რომელიც 2024 წლის 31 დეკემბრამდე საქალაქო და სააპელაციო სასამართლოებში მოსამართლეთა უვადოდ გამწესების შეჩერებას ითვალისწინებს.

საკანონმდებლო ინიციატივას პარლამენტის ცხრა წევრი: ეკა ბესელია, გედევან ფოფხაძე, ლევან გოგიჩაიშვილი, ოთარ ჩრდილელი, ალექსანდრე ერქვანია, ზვიად კვაჭანტირაძე, კობა ნარჩემაშვილი, დავით ჭიჭინაძე და ლევან კობერიძე აწერს ხელს.

კანონპროექტის მიხედვით, საქართველოს ორგანულ კანონში შესატანი ცვლილებებს გულისხმობს, მოსამართლეთა უვადოდ გამწესება 2024 წლამდე უნდა შეჩერდეს.

ინიციატივა მიუღებელია იუსტიციის უმაღლესი საბჭოს მოსამართლე წევრებისთვის. საბჭოს თავმჯდომარე გიორგი მიქაუტაძე აცხადებს, რომ კანონპროექტი ყოველგვარ საზღვარს გასცდა.

მიქაუტაძის შეფასებით, ამგვარი ცვლილება კანონში სასამართლო სისტემაში უკან გადადგმული ნაბიჯია.

მიქაუტაძის განცხადებით, ესაა მცდელობა, რომ მოსამართლეები რომლებიც ბოლო წლებში უფრო დამოუკიდებლები გახდნენ, დაბრუნდნენ იმ დროში როცა მხოლოდ ვადაზე ფიქრობდნენ.

საბჭოს თავმჯდომარე ამბობს, რომ კანონპროექტს, რომელსაც ხელს 9 დეპუტატი აწერს ერთადერთი მიზანი აქვს - სასამართლოს სამართავად და გასაკონტროლებლად გარკვეული მექანიზმები დარჩეს.

კანონპროექტი მიუღებელია საბჭოს მოსამართლე წევრის, სერგო მეთოფიშვილისთვისაც. მისი თქმით, ქართველმა პოლიტიკოსებმა მოინდომეს გზაზე დამდგარი სასამართლო დააბრუნონ უკან წარსულში.