სკოლაში პოლიტიკური დევნის მორიგი ფაქტი - ბაჩანა შენგელია პედაგოგებზე ზეწოლას სისტემურ პრობლემად აფასებს

პოლიტიკა - 20:13, 09 Feb, 2019

1099

პოლიტიკურ დევნასთან დაკავშირებით ზუგდიდის მე-15 საჯარო სკოლის ყოფილი დირექტორის მიერ გაკეთებულ განცხადებას, მე-6 საჯარო სკოლის გარდაცვლილი დირექტორის, ია კერზაიას, შვილი ეხმაურება. ბაჩანა შენგელიას თქმით, კიდევ ერთხელ დადასტურდა, რომ წინასაარჩევნოდ სკოლის პედაგოგების მიმართ სისტემური დევნა ხორციელდებოდა. შენგელია განათლების სამინისტროსგან სწრაფ და ეფექტიან რეაგირებას ითხოვს. მისი თქმით, მნიშვნელოვანია, რომ ამ თემაზე საჯარო საუბარი დაიწყოს ყველა იმ პედაგოგმა, რომელსაც წინასაარჩევნოდ რაიმე ფორმით აგიტაციაში ჩართვას აიძულებდნენ.

„უკვე ყოფილი დირექტორიც ადასტურებს ამას და ისიც პოლიტიკური ნიშნით გათავისუფლდა და ისიც იმავე მოტივით, რომ არ თანამშრომლობდა და აგიტაციას არ ეწეოდა სალომე ზურაბიშვილის სასარგებლოდ. ეს მეტყველებს სისტემურ პრობლემაზე, რაც გამოიხატება ადამიანების პოლიტიკურ დევნაში და რომლის მთავარი ინსტრუმენტი - განმახორციელებელი, არის რესურსცენტრი, ამ შემთხვევაში ზუგდიდის რესურსცენტრის ხელმძღვანელი. აუცილებლად უნდა იქნას ეს საკითხი გამოკვლეული სისხლის სამართლის დანაშაულის კუთხით, რაც არის უკანონო დავალებების მიცემა და ადამიანების ჩართვა აგიტაცია-პროპაგანდაში, რაც მათ ეკრძალებათ „ზოგადი განათლების შესახებ“ კანონით.“ - განაცხადა ბაჩანა შენგელიამ.