"ქართული მედია დეზინფორმაციას ავრცელებს... დამისახელეთ ერთი გატაცებული ადამიანი მაინც" - საოკუპაციო რეჟიმის წარმომადგენელი ერგნეთის შეხვედრაზე

პოლიტიკა - 19:17, 08 Feb, 2019

977

ერგნეთში ინციდენტების პრევენციისა და მათზე რეაგირების მექანიზმის ფარგლებში მორიგი შეხვედრა გაიმართა. შეხვედრაზე ქართული მხარე სოფელ ხურვალეთის მიმდებარე ოკუპირებულ ტერიტორიაზე საოკუპაციო რეჟიმის მიერ სათვალთვალო კოშკურის აღმართვის საკითხს დააყენეს. საუბარი იყო არჩილ ტატუნაშვილის წამებისა და სასტიკი მკვლელობის ფაქტზე. ასევე, დავით ბაშარულის გაურკვეველ ვითარებაში გარდაცვალებასთან დაკავშირებით არსებულ კითხვებზეც. შეხვედრაზე, 6 საათს გაგრძელდა. ოკუპირებული ცხინვალის დე ფაქტო ხელისუფლების წარმომადგენლის ეგორ კოჩიევის თქმით, ხურვალეთში ოკუპანტების მიერ სათვალთვალო კოშკის მშენებლობა საფრთხეს არ წარმოადგენს და მას მხოლოდ სადამკვირვებლო ფუნქცია აქვს:

„შეხვედრაზე ქართული მხარე აცხადებდა, რომ ეს კოშკი საფრთხეს წარმოადგენს, ეს ტყუილია, მას მხოლოდ და მხოლოდ სადამკვირვებლო ფუნქცია აქვს, რომელიც ემსახურება, მათ შორის ხანძრებზე დაკვირვებასაც, რაც ამ ბოლო დროს საკმაოდ გახშირდა.“- განაცხადა ეგორ კოჩიევმა.

კოჩიევმა ქართული მედია ცხინვალის რეგიონში არსებულ ვითარებასთან დაკავშირებით დეზინფორმაციის გავრცელებაში დაადანაშაულა, მისი თქმით, ე.წ საზღვარზე ადამიანების დაკავება არა გატაცება, არამედ საზღვრის უკანონო კვეთისთვის დაკავებაა:

„განვიხილეთ ბევრი საკითხი, მათ შორის ვილაპარაკეთ ქართული მედიის მხრიდან დეზინფორმაციის გავრცლებაზეც. მაგალითად ინფორმაცია ადამიანების გატაცების შესახებ, რომ თითქოს ჩვენთან ჰუმანიტარული კატასტორფაა და ვშიმშილობთ. დამისახელეთ ერთი გატაცებული ადამიანი მაინც. მღვდელი იყო დაკავებული, თუმცა ეს სხვა ისტორიაა. თუ ჩემი არ გჯერათ, მას კითხეთ, როგორ გადაძვრა ღობეზე. ის დააკავეს საზღვრის უკანონო კვეთის გამო.“- აღნიშნა კოჩიევმა.

როგორც ცხინვალის რეგიონის საოკუპაციო რეჟიმის წარმომადგენელმა შეხვედრის შემდეგ განაცხადა, მისი მხრიდან პროტესტი იყო გამოთქმული, შეხვედრაზე არჩილ ტატუნაშვილის საკითხის განხილვის გამო, რადგან კოჩიევის თქმით ეს საკითხი ერგნეთში გამართული შეხვედრების ფორმატში არ ჯდება.

„საუბარი იყო ტატუნაშვილის საქმეზეც, სამხრეთ ოსეთის მხარემ კიდევ ერთხელ განაცხადა, რომ ყველა მასალა გადაცემულია და პროტესტი გამოვთქვი, რადგან ეს საკითხი არ ჯდება ჩვენი მოლაპარაკებების ფორმატში “- განაცხადა კოჩიევმა.